वणी टाईम्स न्युज | तालुक्यातील मौजा निवली परिसरात महावितरणाच्या 11 केव्ही वीज खांब चोरीचा प्रयत्न उघडकीस आल्याने खळबळ उडाली आहे. या प्रकरणात पती पत्नी दोघांना ताब्यात घेण्यात आले असून, आणखी दोघे आरोपी अंधाराचा फायदा घेत फरार झाले आहेत.
मिळालेल्या माहितीनुसार, सहाय्यक अभियंता वैभव बंडुजी सिडाम (वणी ग्रामीण वीज वितरण केंद्र) यांनी शिरपूर पोलीस स्टेशनमध्ये दिलेल्या लेखी तक्रारीनुसार, 17 एप्रिल 2026 रोजी रात्री अंदाजे 8.30 ते 9.00 वाजताच्या सुमारास निवली ते तरोडा मार्गावर सुंदरनगर येथील 11 केव्ही लाईनचे लोखंडी खांब जमिनीतून उपसून चोरी करण्याचा प्रयत्न सुरू असल्याची माहिती मिळाली.
माहितीवरून सिडाम व त्यांच्या सहकाऱ्यांनी तत्काळ घटनास्थळी धाव घेतली असता, काही चोरटे जमिनीत गाडलेले खांब उपसण्याचे काम करत असल्याचे दिसून आले. अचानक कर्मचारी पोहोचल्याचे लक्षात येताच दोन आरोपी घटनास्थळावरून पळून गेले. मात्र, एक महिला आणि एक पुरुष यांना घटनास्थळीच पकडण्यात यश आले.
मोहदा येथे क्रशर प्लांटवर अपघात : ट्रक मागे घेताना चिरडून चालक ठार
दरम्यान, घटनेची माहिती मिळताच शिरपूर पोलिसांनी तत्काळ घटनास्थळी धाव घेतली. पकडलेल्या आरोपींना पोलिसांच्या ताब्यात देण्यात आले असून, त्यांच्या जवळून एक दुचाकी आणि चोरीसाठी वापरले जाणारे साहित्यही जप्त करण्यात आले आहे.
पोलिसांनी ताब्यात घेण्यात आलेल्या आरोपी धनु राघो थोटे व सकुबाई धनु थोटे, रा. खरबडा मोहल्ला वणी विरुद्ध कलम 303(2) व 62 नुसार गुन्हा दाखल केला आहे. या घटनेत महावितरणाचे आर्थिक नुकसान झाले असून, फरार आरोपींचा शोध सुरू असल्याची माहिती पोलिसांनी दिली. वणी परिसरात व ग्रामीण भागात भंगार चोरटे सक्रिय असून वीज कंपनीचे अल्मयुनियम तारा व लोखंडी खांब तसेच शेतातील मोटार केबल चोरीचे प्रमाण वाढले आहे.
