वणी टाईम्स न्युज | कौटुंबिक विश्वासाला तडा देणारी धक्कादायक घटना मारेगाव शेतशिवारात समोर आली आहे. स्वतःच्या जावयानेच सासूच्या मालकीचा ट्रॅक्टर व शेतीची अवजारे चोरून नेल्याची तक्रार मारेगाव पोलीस स्टेशनमध्ये दाखल झाली आहे.
फिर्यादी बेबीताई कुर्मदास काळे (73) रा. बल्लारपूर, जि. चंद्रपूर यांनी मारेगाव पोलीस ठाण्यात जबानी रिपोर्ट दिला की, त्यांच्या मालकीची मौजा मारेगाव येथील गट क्र.254 मधील 30.64 हे.आर शेतजमीन आहे. सदर शेती मागील दोन वर्षांपासून त्यांचे जावई सागर आवारी, रा. मारेगाव यास ठेक्याने दिली होती. तसेच शेती वाहण्यासाठी त्यांच्या मालकीचा ट्रॅक्टर व इतर शेती अवजारे देखील जाण्याच्या ताब्यात देण्यात आले होते. मात्र 1 एप्रिल 2026 पासून फिर्यादी यांनी शेती व ट्रॅक्टर परत घेत, पुढील व्यवहार बंद केल्याचे सांगितले.
दरम्यान, 9 एप्रिल 2026 रोजी दुपारी सुमारे 12 वाजता फिर्यादी आपल्या पती व मुलासह शेतात गेल्या असता, शेतात ठेवलेली ट्रॅक्टरची मुंडी तसेच इतर शेती अवजारे गायब आढळली. यामध्ये पाण्याच्या मोटरचे साहित्य, चैन बॉक्स, कल्टिवेटर, ‘व्ही फास’ आदी सुमारे 1 लाख 90 हजार रुपयांचा माल चोरीला गेल्याचे निदर्शनास आले. यावेळी स्थानिक व्यक्ती कृष्णा अण्णा यांनी आरोपी सागर आवारी हा ट्रॅक्टर घेऊन जाताना दिसल्याची माहिती दिल्याचे तक्रारीत नमूद आहे.
या घटनेनंतर फिर्यादी हिने तात्काळ पोलीस ठाण्यात धाव घेत आरोपी जावई सागर सुरेश आवारी (35) व त्याचे वडील सुरेश आवारी (70), रा. मारेगाव वार्ड क्र. 05 यांच्याविरुद्ध ट्रॅक्टर व इतर साहित्य, किंमत 1,90,000 रुपये चोरून नेल्याची तक्रार दाखल केली. तक्रारीवरून पोलिसांनी आरोपी पिता पुत्रावर भारतीय न्याय संहिता कलम 303(2), 3(5) अन्वये गुन्हा नोंद केला. सदर प्रकरणाचा पुढील तपास पोहेकॉ शंकर बारेकर करीत असून, आरोपींचा शोध सुरू आहे.
