वणी टाईम्स न्युज: कवी शांता शेळके यांनी मराठी सिनेमा “आपली माणसं” साठी “झाले गेले विसरुनी जावे, पुढे पुढे चालावे” हा गीत लिहिले होते. याच गीताचे संदर्भ लक्षात घेऊन वणी भाजपमधील गटबाजी दुर करण्याचे प्रयत्न सुरु आहे. भाजपचे आजी माजी जिल्हाध्यक्षांच्या उपस्थितीत नुकतेच वणी येथील विश्रामगृहात वणी विधानसभा भाजप पदाधिकाऱ्यांची बैठक पार पडली. या बैठकीत वणी भाजपमधील दोन्ही गटाचे नेते व पदाधिकाऱ्यांना मनभेद विसरुन येणाऱ्या स्वराज्य संस्था निवडणुकात एकत्र होऊन काम करण्याचा कानमंत्र देण्यात आला.
उल्लेखनीय आहे की, विधानसभा निवडणुकीत भाजप उमेदवाराच्या पराभवानंतर पक्षामध्ये दोन गट निर्माण झाले होते. कालांतराने दोन्ही गटात मनभेद वाढत गेले. पक्षाच्या कार्यक्रमात दोन्ही गटाचे नेते एका मंचावर जरी उपस्थित असले तरी एकमेकांपासून दुरी स्पष्ट जाणवत होती. काही दिवसांपासून भाजप जिल्हा उपाध्यक्ष पदावरून माजी आमदार संजीवरेड्डी बोदकुरवार व प्रदेश कार्यकारिणी सदस्य विजय चोरडिया यांच्यामध्ये चांगलीच रस्सीखेच झाली होती.
चोरडिया यांनी भाजपमध्ये राष्ट्रीय स्वयंसेवक संघाचे वर्चस्व वापरून पुत्र कुणाल चोरडियासाठी भाजप जिल्हा उपाध्यक्ष पद खेचून आणले. उगाच वाद नको म्हणून पक्षश्रेष्ठींनी संजीवरेड्डी बोदकुरवार गटाचे रवी बेलूरकर व संजय पिंपळशेंडे या दोघांनाही जिल्हा उपाध्यक्ष पद बहाल केले. मात्र तान्हापोळा या सणानिमित्त दोन्ही गटाने आयोजित केलेले स्पर्धा आयोजनावरून पक्षाची फूट रस्त्यावर आल्याचे दिसून पडले. याबाबत वणी टाईम्सने प्रामुख्याने लेख प्रकाशित केले होते.
येत्या काही महिन्यात नगर परिषद, जिल्हा परिषद व पंचायत समित्यांचे निवडणुका होणार आहे. अशातच वणी भाजपमधील फूट ही पक्षासाठी घातक ठरणार असल्याची कल्पना पक्षातील वरिष्ठ नेत्यांना वाटली. त्यामुळे रविवार 31 ऑगस्ट रोजी भाजप जिल्हाध्यक्ष ॲड. प्रफुल चव्हाण व माजी जिल्हाध्यक्ष नितीन भुतडा यांनी वणी येथील विश्रामगृहात बैठक घेतली. बैठकीत शहरात पक्षाचे कोणतेही आयोजन मंडळ अध्यक्ष यांच्या परवानगीनेच होणार असल्याचे निर्देश जिल्हाध्यक्षांनी दिल्याचे बोलले जाते.
या बैठकीत भाजप जिल्हाध्यक्ष ॲड. प्रफुल चव्हाण व माजी जिल्हाध्यक्ष नितीन भुतडासह माजी आमदार संजीवरेड्डी बोदकुरवार, भाजप शहर अध्यक्ष एड. निलेश चौधरी, जिल्हा उपाध्यक्ष रवी बेलूरकर, जिल्हा उपाध्यक्ष संजय पिंपळशेंडे, माजी जिल्हाध्यक्ष तारेंद्र बोर्डे, भाजप जिल्हा कमिटीचे निमंत्रित सदस्य विजय चोरडिया, भाजप किसान आघाडी सदस्य दिनकर पावडे, विजय पिदुरकर तसेच भाजपचे पदाधिकारी व कार्यकर्ता उपस्थित होते.
