वणी टाईम्स न्युज: आजच्या युगात प्रामाणिकपणा राहिलाच नाही, असं म्हणणाऱ्यांनी ही बातमी अवश्य वाचा. सायकल दुरुस्ती करणाऱ्या एका मॅकेनिकने रस्त्यावर सापडलेले मोबाईल असेसरीचे पार्सल मूळ मालकाला परत करून ईमानदारीचा परिचय दिला आहे. तब्बल 22 हजार रुपये किमतीचे आयफोनचे ओरिजनल चार्जर परत मिळाल्याने संबंधित दुकानदारांनी मॅकेनिकचे आभार मानले.
नांदेपेरा मार्गावर जगन्नाथ मठाजवळ अनिल सायकल अँड टू व्हिलर रिपेरिंग सेंटर नावाने दुरुस्तीची दुकान आहे. 15 ऑगस्ट रोजी 4 वाजता दरम्यान दुकान संचालक अनिल बेलेकर हे दुकानाचे बाहेर बसून असताना त्यांना रस्त्यावर खाकी रंगाच्या बॉक्समध्ये एक पार्सल दिसून पडला. त्यांनी पार्सल उचलून पहिला असता त्यावर रौनक मोबाईल शॉप वणी असे लिहून होते. तसेच नावाखाली मोबाईल नंबर सुद्धा लिहून होते. पार्सलवर लिहिलेल्या पत्त्यावरून आतमध्ये मोबाईल किंवा साहित्य असल्याचे अनिल बेलेकर यांचे लक्षात आले.
परंतु मनात कोणतीही बेइमानी न बाळगता अनिल बेलेकर यांनी रौनक मोबाईल शॉपचे मालकाला फोन करून त्यांची पार्सल सापडल्याचे कळविले. त्यानंतर मोबाईल दुकान मालकाने नांदेपेरा मार्गावर अनिल सायकल दुरुस्ती दुकानात येऊन आयफोन चार्जरची पार्सल अनिल बेलेकर कडून घेऊन त्यांचे आभार मानले. सदर पार्सल ट्रान्सपोर्ट मधून आणताना रिक्षा चालकाच्या अनवधानाने रस्त्यावर पडल्याचे त्यांनी सांगितले.
