वणी टाईम्स न्युज : तालुक्यात सद्य रेती तस्करीला ऊत आले असून काही राजकीय पदाधिकारी व कार्यकर्तेही पडद्याआड रेती तस्करीत गुंतल्याचे बोलले जाते. त्यासाठी त्यांनी वेगळा फंडा अमलात आणला आहे. रेती घाटावरून रेतीची वाहतूक करणारा ट्रकचा मालक एक, रेती तस्करी करणारा तस्कर दुसरा आणि प्रत्यक्ष ग्राहकांना रेती विक्री करून पैसा घेणारा माणूस तिसराच.! विशेष म्हणजे एखाद्या वेळी महसूल किंवा पोलिस विभागाने गाडी पकडल्यास गुन्हेगार म्हणजे वाहनाचा चालक. या सगळ्या चक्रव्युहात गुन्हा दाखल होतो चालकावर आणि दंड भरावं लागतं ट्रक मालकाला. खरा गुन्हेगार रेती तस्कर पडद्यामागेच राहतो.
शुक्रवार 25 जुलै रोजी रात्री 10.40 वाजता शहरातील रवीनगर भागात पकडलेल्या वाहनाची कथा काही अशीच असल्याची माहिती हाती आली आहे. माहितीनुसार अवैधरीत्या विना परवाना रेतीची वाहतूक करणारा टाटा हायवा क्रमांक MH34 BG1596 हा चिन्ना टोपण नाव असलेल्या एका व्यक्तीचा आहे. त्यामध्ये जी रेती भरलेली होती ती रेतीच्या धंद्यात नव्याने उतरलेल्या एका व्यक्तीची तर सेल्स मॅनेजर म्हणून पटेल नावाचा व्यक्ती ट्रक सोबतच एका चारचाकी वाहनात पेट्रोलिंग करत होता.
वणीचे ठाणेदार पोलीस निरीक्षक गोपाल उंबरकर यांनी स्वतः ही गाडी पकडल्यामुळे रेती तस्कराचा नेहमी प्रमाणे “सेटिंग” व दबावतंत्रचा प्रयोग फसला. सदर वाहनाला रात्रीच पोलीस स्टेशनला आणून ट्रक चालकावर गुन्हा दाखल करण्यात आला. रेतीची अवैधरीत्या वाहतूक करणारा ट्रक क्रमांक MH34 BG 1596 हा यापूर्वी एकदा रेती तस्करी करताना आढळला होता. त्यावेळी दंड वसूल करुन वाहन सोडण्यात आले. मात्र आता तोच वाहन दुसऱ्यांदा विना परवाना रेती वाहतूक करताना आढळला. त्यामुळे बाँड ऑफ अंडरटेकिंगचा भंग केल्या प्रकरणी वाहनावर तिप्पट दंड किंवा वाहन शासन जमा करण्याचा कायदा लागू होतो.
रेतीचे अवैध उत्खनन व तस्करीमुळे शासनाचा कोट्यवधी रुपयांचा महसूल बुडत आहे. रेती तस्करीवर आळा घालण्यासाठी महसूल विभाग व पोलीस प्रशासनाने कठोर पावले उचलण्याची गरज आहे. रेतीच्या वाहनावर दंड आकारणी शिवाय वाहन मालक व रेती तस्करावर गुन्हे दाखल केल्यास त्यांना धाक बसणार. तसेच रेती वाहतूक करणाऱ्या प्रत्येक वाहनाला GPS सिस्टिम आहे की नाही, आणि आहे तर त्याची लोकेशन ट्रेस करणे गरजेचे आहे. शुक्रवारी जप्त केलेले ट्रकचे मालक व रेती मालकाचा शोध लावून त्यांच्यावर गुन्हे दाखल केल्यास तस्करी रोखण्यास मदत होईल असे नागरिकांचे मत आहे.
