जितेंद्र कोठारी, वणी |
शासकीय कामासाठी निर्धारित शुल्क व्यतिरिक्त लाच घेणे हा शिष्टाचारचा एक भाग झाला आहे. मात्र नगर परिषद वणी येथील नियोजन समिती सभापती लक्ष्मण उरकुडे यांनी आपल्या कार्यालयाबाहेर लावलेल्या सूचना फलकामुळे पारदर्शक प्रशासनाचा सकारात्मक संदेश नागरिकांपर्यंत पोहोचत आहे. या फलकाद्वारे नागरिकांना स्पष्टपणे सूचित करण्यात आले आहे की, नियोजन विभागांतर्गत कोणत्याही बांधकाम परवानगीसह इतर कामांसाठी कोणासोबतही आर्थिक व्यवहार करू नयेत.
या सूचनेत नमूद केल्याप्रमाणे, वणी नगर परिषद कार्यालयात सर्व कामे शासकीय नियमांनुसार आणि निश्चित शुल्कानुसारच केली जातात. त्यामुळे कोणत्याही व्यक्तीने अतिरिक्त पैसे मागितल्यास नागरिकांनी तत्काळ नियोजन सभापती यांच्याशी संपर्क साधावा, असे आवाहन करण्यात आले आहे.
नियोजन सभापती यांच्या ह्या उपक्रमामुळे नागरिकांमध्ये विश्वास निर्माण होत असून, दलालांच्या हस्तक्षेपाला आळा बसण्यास मदत होणार आहे. प्रशासनातील पारदर्शकता वाढवण्याच्या दृष्टीने हे पाऊल महत्त्वाचे मानले जात असले तरीही नगर परिषद मधील इतर विभागांमध्ये ही असेच फलक लावण्यात येणार का ?
स्थानिक नागरिकांनी या उपक्रमाचे स्वागत करत, “अशा स्पष्ट सूचनांमुळे फसवणूक टाळता येईल आणि कामे अधिक सुलभ होतील,” अशी प्रतिक्रिया व्यक्त केली आहे. एकंदरीत, वणी नगर परिषदेकडून नागरिकाभिमुख आणि स्वच्छ प्रशासनाची दिशा दाखवणारा हा उपक्रम आदर्श ठरत आहे.
