वणी टाईम्स न्युज : नगर परिषद निवडणुकीसाठी नामांकन अर्ज दाखल करण्याचा शेवटच्या दिवशी सोमवारी वणी येथील निवडणूक निर्णय अधिकारी कार्यालयात गर्दी उसळली. सोमवारी तब्बल 101 अर्ज दाखल झाले. त्यात नगरसेवक पदासाठी 96 तर नगराध्यक्ष पदासाठी 5 अर्ज स्वीकारण्यात आले. यासोबतच वणी नगर परिषद नगराध्यक्ष पदाकरीता एकूण 9 अर्ज तर नगरसेवकाच्या 29 जगासाठी तब्बल 195 अर्ज निवडणूक विभागाकडे दाखल करण्यात आले आहे.
भारतीय जनता पक्षाच्या नगराध्यक्षसह 30 उमेदवारांनी रविवार 16 नोव्हेंबर रोजी निवडणूक कार्यालयात अर्ज सादर केले. पक्षातर्फे सोमवारी सर्व उमेदवारांना अधिकृत एबी फार्म देण्यात आले असून उमेदवारांनी निवडणूक कार्यालयात दाखल अर्जासोबत एबी फार्म जोडले. यासोबतच शिवसेना (शिंदे), शिवसेना (उबाठा), काँग्रेस, राष्ट्रवादी काँग्रेस (शरदचंद्र पवार), वंचित बहुजन आघाडी व अपक्ष उमेदवारांनी आपले अर्ज दाखल केले.
राष्ट्रीय व प्रादेशिक राजकीय पक्षाकडून उमेदवारी मिळण्यात अपयशी ठरलेल्या काही इच्छुकांनी सोमवारी अपक्ष उमेदवार म्हणून नामांकन भरले. तर पक्षाकडून तिकीट नाकारलेले काही कार्यकर्त्यांनी दुसऱ्या पक्षात प्रवेश करून तिकीट मिळविले. नामांकन परत घेण्याचे शेवटचे दिवस 26 नोव्हेंबर नंतर निवडणूक रिंगणात किती उमेदवार राहणारआहे हे स्पष्ट होईल.
