🏫 वणी नगर परिषदेवर भाजपची सत्ता स्थापन करण्याचा माजी आमदार संजीवरेड्डी बोदकुरवार यांचा दावा
वणी टाईम्स न्युज : आगामी 2 डिसेंबर रोजी होणाऱ्या वणी नगर परिषद निवडणुकीसाठी भारतीय जनता पार्टीने आज, मंगळवारी सकाळी 9 वाजता औपचारिकरीत्या प्रचाराचा नारळ फोडत प्रचारयात्रेला सुरुवात केली. शहरातील ऐतिहासिक जैताई मंदिर येथे माजी आमदार संजीवरेड्डी बोदकुरवार यांच्या उपस्थितीत भाजपचे सर्व उमेदवार, पदाधिकारी व कार्यकर्त्यांनी माता जैताईचे दर्शन घेत आगामी निवडणूक प्रचाराला प्रारंभ दिला.
वणी नगर परिषदेमध्ये 14 प्रभागांसाठी एकूण 29 नगरसेवक तसेच नगराध्यक्ष पदासाठी 2 डिसेंबर रोजी मतदान होणार आहे. त्याआधी पक्षाचा प्रचार जोरात नेण्याचा निर्धार भाजपने आजच्या शुभारंभातून स्पष्ट केला. मंदिर परिसरात उपस्थित उमेदवार व पदाधिकाऱ्यांनी एकजुटीने निवडणूक लढवण्याची ग्वाही दिली असून, जनतेचा कौल मिळवण्यासाठी घराघरात पोहोचण्याचे नियोजन आजच्या बैठकीत निश्चित करण्यात आले.पक्षाच्या या शुभारंभी कार्यक्रमामुळे वणी शहरातील निवडणूक वातावरण अधिक तापले आहे.
प्रचार कार्य शुभारंभ वेळी माजी आमदार संजीवरेड्डी बोदकुरवार, भाजप शहर अध्यक्ष ऍड निलेश चौधरी, जिल्हा उपाध्यक्ष संजय पिंपळशेंडे, माजी नगराध्यक्ष तारेंद्र बोर्डे, माजी उपाध्यक्ष श्रीकांत पोटदुखे, दिनकर पावडे, गजानन विधाते यांचेसह प्रभाग प्रभारी, पदाधिकारी, नगराध्यक्ष पदाच्या उमेदवार विद्या सचिन आत्राम व सर्व 29 उमेदवार उपस्थित होते.
वणी नगर परिषदेवर भाजप सत्ता स्थापन करणार !
नगर परिषद निवडणुकीसाठी उमेदवार ठरवण्यापासून तर नामांकन दाखल करण्यापर्यंत भारतीय जनता पार्टी इतर पक्षाच्या पुढे राहिली आहे. आणि आता प्रचार कार्यातही भाजपने आघाडी घेतली आहे. निवडणुकीत मतांच्या बाबतीतही भाजप सर्वांपुढे राहणार. वणी नगर परिषदेवर पुन्हा भाजपच सत्ता स्थापन करणार. असा ठाम दावा यावेळी माजी आमदार संजीवरेड्डी बोदकुरवार यांनी केला.
