वणी टाईम्स न्यूज : नगर परिषद निवडणुकीची तारीख जवळ येत असताना शहरातील प्रचाराचा तापमानदर चांगलाच चढू लागला आहे. याच पार्श्वभूमीवर शुक्रवारी प्रभाग क्रमांक १ मध्ये भारतीय जनता पक्षाच्या उमेदवारांनी प्रभावी शक्तिप्रदर्शन करीत भव्य प्रचार रॅली काढली. नगराध्यक्ष पदाच्या भाजप उमेदवार विद्या खेमराज आत्राम, तर नगरसेवक पदाचे उमेदवार उमाकांत उर्फ बालू जोगी व मीनाक्षी शैलेश जूनघरे यांच्या समर्थनार्थ ही रॅली काढण्यात आली. माजी नगराध्यक्ष तारेंद्र बोर्डे यांच्या नेतृत्वात ही रॅली भव्य दिमाखात पार पडली.
प्रचार रॅलीत प्रभागातील शेकडो महिला-पुरुष भाजपा कार्यकर्ते, समर्थक ढोल-ताशांच्या गजरात, हातात झेंडे व फलक घेऊन घोषणाबाजी करत सहभागी झाले. रॅलीने बँक कॉलनी हनुमान मंदिर येथून प्रारंभ करून आयटीआय कॉलनी, गुलमोहर पार्क, रविनगर, वडगाव रोड, विठ्ठलवाडी मार्गे पुन्हा बँक कॉलनीत पुनरागमन केले. रॅलीदरम्यान माजी नगराध्यक्ष तारेंद्र बोर्डे, प्रभाग प्रभारी नितीन वासेकर तसेच दोन्ही नगरसेवक पदाचे उमेदवार नागरिकांना भेटून भाजपच्या उमेदवारांना विजयी करण्याचे आवाहन करत होते.
प्रभाग क्रमांक १ अंतर्गत नांदेपेरा रोड, सहारा पार्क, नवकार नगर, विद्यानगरी, अयोध्या नगरी, सहकारी बँक कॉलनी, आयटीआय कॉलनी, रविनगरचा काही भाग, गुलमोहर पार्क, विठ्ठलवाडी, रेल्वे स्टेशन परिसर आणि पट्टाचार नगर या महत्त्वाच्या वस्तींचा समावेश होतो. या प्रभागात प्रामुख्याने नोकरीपेशा व सुशिक्षित मतदारवर्ग मोठ्या प्रमाणावर असून, हा मतदारवर्ग जात-धर्मापेक्षा विकासाला प्राधान्य देणाऱ्या नेतृत्वाचा समर्थक म्हणून ओळखला जातो. त्यामुळेच शहरातील सर्वच १४ प्रभागांमध्ये भाजप उमेदवारांना मिळणारा उत्स्फूर्त प्रतिसाद अधिक दृढ झाल्याचे चित्र आहे.
यापूर्वी माजी आमदार संजीवरेड्डी बोदकुरवार यांनीही प्रभाग क्रमांक १ मध्ये घर-घर भेट देत नागरिकांशी संवाद साधला. शहराच्या सर्वांगीण विकासासाठी भाजपच्या उमेदवारांना मतदान करून निर्णायक भूमिका बजावण्याचे आवाहन त्यांनी मतदारांना केले. ही प्रचार मोहीम पाहता प्रभाग क्रमांक १ मध्ये भाजपने जोरदार पकड निर्माण केल्याचे चित्र स्पष्ट झाले आहे.
