वणी टाईम्स न्युज : वणी नगर परिषद निवडणुकीत पक्षाचे निष्ठावान कार्यकर्त्यांना डावलून दुसऱ्या पक्षातून आयात झालेल्या कार्यकर्त्यांना तिकीट देण्यावरून राजकीय पक्षांमध्ये नाराजीनाट्य सुरू आहे. अशातच शिवसेना (उद्धव बाळासाहेब ठाकरे) पक्षाच्या एका अज्ञात कार्यकर्ताने आमदार संजय देरकर व जिल्हाध्यक्ष संजय निखाडे यांना संबोधून सोशल मीडियावर एक खुला पत्र लिहून आपली नाराजी उघडपणे मांडली आहे.
शिवसेनेच्या एका व्हॉट्सॲप ग्रुपवर व्हायरल या पत्रात त्या कार्यकर्त्यांनी म्हटलं आहे की, हाडाच्या कार्यकर्तांना डावलून प्रभाग क्रमांक 14 मध्ये आयातीत उमेदवाराला उमेदवारी देणे हे न पटण्यासारखे आहे. विधानसभा निवडणुकीत आम्ही कार्यकर्त्यांनी रक्ताचे पाणी करून आमदार साहेबांना निवडून आणले. पक्षाच्या प्रत्येक आंदोलनात आम्ही सहभागी होऊन वेळप्रसंगी स्वतःवर पोलिस ठाण्यात गुन्हा ओढून घेतले. मात्र नगर परिषद निवडणूकीत जेव्हा कार्यकर्त्याला संधी देण्याची वेळ आली, तेव्हा मात्र आयातीत उमेदवाराला प्राधान्य दिल्या गेला.
संतप्त कार्यकर्त्यांनी पुढे आपली नाराजी मांडतांना सवाल उपस्थित केला की, “आम्ही कार्यकर्त्यांनी फक्त पक्षासाठी सतरंज्या उचलायला का ?” सच्चे कार्यकर्त्यांची ही खदखद कधीही भूकंप म्हणून बाहेर पडू शकते, असा इशाराही या खुल्या पत्रात देण्यात आला आहे. येणाऱ्या पंचायत समिती व जिल्हा परिषद निवडणुकीत पक्षातील कार्यकर्त्यांना आपण उचित संधी द्यावी अशी विनंती पत्रात शेवटी करण्यात आली आहे.
