वणी टाईम्स न्युज : नातेवाईकांच्या घरी जात असताना वाटेतच रस्त्याच्या कडेला दुचाकी उभी करुन लघुशंकेला जाणे एका व्यक्तीला चांगलेच महागात पडले. रस्त्यावर उभी बाईक एका अनोळखी इसमाने नजरेदेखत लंपास केली. सगळीकडे शोधाशोध करुन ही दुचाकी मिळून आली नाही. शेवटी फिर्यादी सुदर्शन चिंतामण धवणे (35), राह. पळसगाव, तालुका बल्लारपूर, जिल्हा चंद्रपूर यांनी वणी पोलीस ठाण्यात दुचाकी चोरी गेल्याची तक्रार नोंदवली.
तक्रारीनुसार फिर्यादी हा दिनाक 7 जुलै रोजी सायंकाळी मारेगाव तालुक्यातील मार्डी येथे त्याच्या साडूच्या घरी जाण्यासाठी मोटरसायकलवर निघाला होता. दरम्यान रात्री 8 वाजता वणी मारेगाव मार्गावर मचान धाब्याजवळ त्याला लघुशंका जाणवली. त्यामुळे त्यांनी हिरो स्प्लेंडर बाईक क्रमांक MH34 CN2066 ही रस्त्याच्या कडेला उभी करून लघुशंका करण्यासाठी रोडच्या खाली उतरला. त्यावेळी चाबी मोटारसायकलला लागूनच होती.
फिर्यादी हा लघुशंका करत असताना एक अनोळखी इसम मोटरसायकल जवळ आला व त्यांनी बाईक स्टार्ट करून मारेगावच्या दिशेने पळ काढला. फिर्यादी यांनी परिसरात व मारेगाव येथे शोध घेतला असता मोटरसायकल मिळून आली नाही. अखेर त्यांनी वणी पोलीस ठाण्यात अज्ञात व्यक्तीने त्याची हिरो स्प्लेंडर दुचाकी किंमत 70 हजार चोरून नेल्याची तक्रार दाखल केली.
