वणी टाईम्स न्युज | मारेगाव तालुक्यातून अल्पवयीन मुली बेपत्ता होण्याच्या घटनांमध्ये वाढ होत असल्याने नागरिकांमध्ये तीव्र चिंता व्यक्त केली जात आहे. अशातच 17 एप्रिल 2026 रोजी दुपारी साडेबारा वाजण्याच्या सुमारास घडलेल्या एका घटनेने पुन्हा एकदा खळबळ उडवली आहे.
मिळालेल्या माहितीनुसार, मारेगाव तालुक्यातील एका गावात राहणाऱ्या मजूर कुटुंबातील 16 वर्षे 10 महिन्यांची मुलगी घरून शौचास जात असल्याचे सांगून बाहेर गेली. मात्र बराच वेळ उलटूनही ती परत न आल्याने वडिलांनी शेजारी व नातेवाईकांकडे शोधाशोध केली. तसेच आसपासच्या गावांमध्येही चौकशी केली, परंतु मुलगी आढळून आली नाही. अखेर अज्ञात व्यक्तीने फूस लावून अपहरण केल्याची शक्यता व्यक्त करत वडिलांनी पोलीस स्टेशनमध्ये जबानी रिपोर्ट दाखल केला आहे.
दरम्यान, मारेगाव तालुक्यातून अनेक अल्पवयीन मुली बेपत्ता होत असल्याच्या घटना समोर येत असल्याने हा प्रकार गंभीर बनला आहे. या घटनांचा राळेगाव येथे घडलेल्या तत्सम प्रकरणांशी काही संबंध आहे का ? असा प्रश्न उपस्थित होत आहे.
स्थानिक नागरिक व सामाजिक कार्यकर्त्यांकडून या प्रकरणांचा सखोल तपास करण्यासाठी विशेष तपास पथक (SIT) स्थापन करण्याची मागणी जोर धरत आहे. राळेगावप्रमाणेच मारेगावमध्येही SIT मार्फत तपास केला जाणार का, याकडे सर्वांचे लक्ष लागले आहे. पोलीस प्रशासनाने या सर्व घटनांची दखल घेत कठोर कारवाई करावी, तसेच बेपत्ता मुलींचा शोध लावून त्यांच्या कुटुंबियांना दिलासा द्यावा, अशी मागणी नागरिकांकडून होत आहे.
