वणी टाईम्स न्युज | गणेशपूर–खडकी मार्गावर मुकुटबन पोलिसांनी केलेल्या कारवाईत गोवंशीय जनावरांची कत्तलीसाठी अमानुष पद्धतीने वाहतूक होत असल्याचे उघडकीस आले. या प्रकरणी एका आरोपीस ताब्यात घेऊन सुमारे ९ लाख ३५ हजार रुपयांचा मुद्देमाल जप्त करण्यात आला आहे.
मिळालेल्या माहितीनुसार, पोलिसांना गोपनीय माहिती मिळाली की, गणेशपूर मार्गे खडकी फाटा येथून अडेगावकडे जाणाऱ्या छोटा हत्ती (Ashok Leyland) वाहन क्रमांक MH-26.CH.0850 मध्ये गोवंशीय जनावरे कोंबून नेली जात आहेत. या माहितीच्या आधारे पोलिस पथकाने सोमवार 30 मार्च रोजी सकाळी पंचांसह घटनास्थळी सापळा रचला.
सकाळी 8.40 मिनिटांनी खडकी फाटा येथे संबंधित वाहन अडवून तपासणी केली असता, वाहनात एकूण ६ गोवंशीय जनावरे (बैल व गो-हे) अतिशय दाटीवाटीने कोंबून ठेवलेली आढळली. जनावरांना आखूड दोऱ्यांनी बांधण्यात आले होते तसेच त्यांच्या खाण्या-पिण्याची कोणतीही व्यवस्था करण्यात आलेली नव्हती. अपुऱ्या जागेत अमानुष पद्धतीने वाहतूक केल्याने जनावरांना वेदना व यातना होत असल्याचे स्पष्ट झाले.
वाहन चालकाने आपले नाव अजीत दत्ता आडे (२९), रा. चोरड, ता. माहूर, जि. नांदेड असे सांगितले. पंचांसमक्ष करण्यात आलेल्या तपासणीत जप्त करण्यात आलेल्या जनावरांची एकूण किंमत सुमारे १ लाख ३५ हजार रुपये असून, वाहनाची किंमत अंदाजे ८ लाख रुपये असल्याचे निष्पन्न झाले. अशा प्रकारे एकूण ९ लाख ३५ हजार रुपयांचा मुद्देमाल जप्त करण्यात आला. जप्त केलेल्या जनावरांची पशुवैद्यकीय अधिकाऱ्यांकडून तपासणी करून त्यांना पुढील देखभालीसाठी श्री गुरु गणेश गोरक्षण चॅरिटेबल ट्रस्ट, रासा (ता. वणी, जि. यवतमाळ) येथे सुपूर्द करण्यात आले.
या प्रकरणी आरोपीविरुद्ध प्राण्यांना क्रूरतेने वागवण्यास प्रतिबंध अधिनियम, १९६० अंतर्गत कलम ११ (१) (घ), (ङ), (झ) अन्वये गुन्हा नोंद करण्यात आला असून पुढील तपास सुरू आहे.
