वणी टाईम्स न्युज | आर्णी तालुक्यातील रहिवासी आणि झरी तालुक्यात कार्यरत असलेल्या एका अविवाहित महिला पोस्टमास्तरला लग्नासाठी दबाव टाकत तिची बदनामी करण्याची धमकी दिल्याचा गंभीर प्रकार समोर आला आहे. या प्रकरणी तरुणीच्या तक्रारीवरून आरोपी अमित संजय आडे ,रा. उमरसरा, यवतमाळ याच्याविरुद्ध पाटण पोलीस ठाण्यात गुन्हा दाखल करण्यात आला आहे.
पोलीस सूत्रांकडून मिळालेल्या माहितीनुसार, संबंधित तरुणी ही सरकारी सेवेत पोस्ट मास्टर म्हणून कार्यरत असून ती झरी तालुक्यातील एका गावात आपल्या आजीसह भाड्याने राहते. दोन वर्षांपूर्वी तिची आरोपीशी ओळख झाली होती. मात्र, नोकरी लागल्यानंतर तिने त्याच्याशी संपर्क ठेवणे बंद केले होते. दरम्यान, आरोपी अमित आडे याने वारंवार फोन करून तिला भेटण्यास व लग्न करण्यास भाग पाडण्याचा प्रयत्न केला. तसेच “माझ्याशी बोल, नाहीतर तुझे फोटो व्हायरल करून बदनामी करीन” अशी धमकी देत मानसिक छळ सुरू ठेवला.
तक्रारीनुसार, आरोपीने पीडितेसोबतचे तसेच तिच्या मित्रांसोबतचे फोटो व्हॉट्सअॅपवर इतरांना पाठवून तिच्याबाबत चुकीची माहिती पसरवली. यामुळे तिची बदनामी करण्याचा प्रयत्न झाल्याचेही समोर आले आहे. याशिवाय आरोपी तिच्या मोबाईल कॉल्सवर लक्ष ठेवत असल्याचीही तक्रार करण्यात आली आहे. या प्रकारामुळे घाबरलेल्या तरुणीने अखेर पाटण पोलीस ठाण्यात धाव घेत तक्रार दाखल केली.
पाटण पोलिसांनी आरोपी अमित संजय आडे विरुद्ध भारतीय न्याय संहिता कलम 351(2), 356, 75(1), 78(2) अन्वये गुन्हा नोंदविला असून पुढील तपास सुरू आहे. पोलिसांकडून आरोपीचा शोध घेतला जात असून, अशा प्रकारच्या सायबर व मानसिक छळाच्या घटनांवर कठोर कारवाई केली जाईल, असा इशाराही देण्यात आला आहे.
