वणी टाईम्स न्युज: वणी तालुक्यातील शेलू (बु) गावात अज्ञात चोरट्यांनी घरासमोर उभी बोलेरो पिकअप चारचाकी गाडी चोरी केली. गाडी चोरी गेल्याबाबत फिर्यादी रानु पुंजाराम मालेकर (42) रा. शेलू (बु), ता. वणी यांनी शिरपूर पोलीस स्टेशन येथे तक्रार दाखल केली आहे.
फिर्यादी यांनी 2011 मध्ये महिंद्रा कंपनीची बोलेरो पिकअप (क्र. MH 29 T 4624) खरेदी केली होती. सदर वाहन भाड्याने देऊन ते आपल्या कुटुंबाचा उदरनिर्वाह करत होते. दिनांक 28 मार्च 2026 रोजी सकाळी सुमारे 6 वाजता त्यांनी ही गाडी रुषी नथुजी रोगे यांच्या शेतातील कापूस वाहतुकीसाठी दिली होती. काम पूर्ण झाल्यानंतर गाडी रोगे यांच्या घरासमोर उभी करण्यात आली. त्यानंतर मालेकर हे घरी गेले.
दरम्यान, संध्याकाळी सुमारे 7 वाजता ते जेवणासाठी पुन्हा त्या परिसरात गेले असता गाडी अंगणातच उभी असल्याचे त्यांनी पाहिले. मात्र, दुसऱ्या दिवशी (29 मार्च) सकाळी सुमारे 8.20 वाजता मजूर सोडण्यासाठी गाडी घेण्यासाठी गेले असता वाहन तेथे आढळून आले नाही. याबाबत विचारणा केली असता संबंधितांना गाडीबाबत काहीही माहिती नसल्याचे सांगण्यात आले. परिसरात शोध घेतल्यानंतरही वाहन सापडले नाही.
चोरीस गेलेली बोलेरो पिकअप पांढऱ्या रंगाची असून तिचा चेसिस क्रमांक MA12N24HKB1L61135 आणि इंजिन क्रमांक GHB1L91673 असा आहे. वाहनाची अंदाजे किंमत सुमारे 2 लाख 50 हजार रुपये आहे. या प्रकरणी अज्ञात चोरट्याविरुद्ध पोलीस स्टेशन शिरपूर येथे गुन्हा दाखल करण्यात आला असून पुढील तपास सुरू आहे.
