वणी टाईम्स न्युज : वणी–मारेगाव मार्गावरील लालपुलिया परिसरात सोमवार दि. 12 जानेवारी 2026 रात्री घडलेल्या अपघातात भरधाव बोलेरो पिकअप वाहनाच्या धडकेत पायदळ जाणाऱ्या व्यक्तीचा मृत्यू झाल्याची घटना समोर आली आहे. या घटनेतील मृतकाचे नाव चेंडकु रामभाऊ आत्राम (52), रा. पळसोणी, ता. वणी असे आहे. याबाबत वैभव चेंडकु आत्राम (22) यांनी दिलेल्या फिर्यादवरून वणी पोलीस ठाण्यात अज्ञात वाहनचालक विरुद्ध कलम 281, 106(1) भा.न्या.सं. अन्वये गुन्हा दाखल करण्यात आला आहे.
फिर्यादीने दिलेल्या माहितीनुसार, दि. 12 जानेवारी रोजी रात्री सुमारे 10.15 वाजताच्या सुमारास चेंडकु आत्राम हे आपली दुचाकी केरला टायर्सजवळ लावून जेवणासाठी रस्ता ओलांडत अमित ढाब्याकडे पायदळ जात होते. दरम्यान मारेगावकडून वणीकडे येणाऱ्या एका बोलेरो पिकअपसारख्या वाहनाने त्यांना जोरदार धडक दिली. धडक दिल्यानंतर वाहनचालक घटनास्थळावरून पसार झाला.
अपघातानंतर स्थानिक नागरिकांनी गंभीर जखमी अवस्थेत चेंडकु आत्राम यांना उपचारासाठी सरकारी दवाखान्यात दाखल केले. मात्र, डॉक्टरांनी तपासणीअंती त्यांना मृत घोषित केले. बोलेरो पिकअप वाहनाचा चालक भरधाव वेगाने व निष्काळजीपणे वाहन चालवत असल्याने हा अपघात घडून मृत्यू झाल्याचा आरोप फिर्यादीत करण्यात आला आहे. या प्रकरणाचा तपास पोहेका अविनाश चिकराम, पोलीस स्टेशन वणी हे करीत आहेत.
