वणी टाईम्स न्युज: येथील घुग्गुस रोड टोल प्लाजा जवळ शिव मंदिराच्यागे आढळलेल्या मृतदेहाची ओळख पटली असून मयत युवक हा कायर येथील असल्याचे निष्पन्न झाले. अजय पुंडलिक शेंडे (30) रा. कायर असे मृतकाचे नाव आहे. मृतक हा 18 सप्टेंबर पासून घरातून बेपत्ता होता. याबाबत शिरपूर पोलीस ठाण्यात मिसिंगची तक्रारही दाखल करण्यात आली होती.
पोलीस सूत्रांनी दिलेल्या माहितीनुसार शिव मंदिराच्या मागे एका इसमाचा मृतदेह पडून असल्याची माहिती एका कॉलरने डायल 112 वर कॉल करून पोलिसांना दिली होती. माहितीवरून सपोनी निलेश अपसुंदे, पोउपनि सुदाम आसोरे, अमलदार राजू देठे, पो.का. ज्ञानेश्वर सोनटक्के, चालक अविनाश देवकर घटनास्थळी पोहचेल. त्या ठिकाणी अंदाजे 30 वर्षीय इसमाचा कुजलेल्या अवस्थेत मृतदेह आढळला. पोलिसांनी घटनास्थळ पंचनामा करून मृतदेह ग्रामीण रुग्णालयात पाठविला.
मृतक युवकाच्या पेंटच्या खिशातून मिळालेल्या मोबाईलवरून मृतक हा कायर येथून बेपता अजय पुंडलिक शेंडे असल्याची ओळख पटली. मृतक अजय हा विवाहित असून घरातून बेपत्ता का झाला ? मागील 10 दिवसांपासून तो कुठे होता ? तसेच त्याच्या मृत्यू हा नैसर्गिक की घातपात आहे ? याबाबतही अद्याप स्पष्ट झाले नाही. शव विच्छेदन अहवाल मिळाल्यानंतर याबाबत स्पष्ट होणार असल्याचे पोलिसांनी सांगितले.
