वणी टाईम्स न्युज : वणी शहरातील जिल्हा परिषद शाळा क्रमांक 8 येथे मुख्याध्यापक म्हणून कार्यरत दिलीप नारायणराव कोरपेनवार (57) यांचे रविवारी पहाटे वरोरा चिमूर मार्गावर अपघाती निधन झाले. शेतात कुक्कुटपालन व्यवसायासाठी ते कुक्कुट आणण्यासाठी बोलेरो पिकअप वाहनात जात होते. दरम्यान आनंदवन ते चिमूर मार्गावर पहाटे 4.30 वाजता दरम्यान एका भरधाव ट्रक ने पिकअप वाहनाला धडक दिली. यात कंडक्टर साइडला बसलेले कोरपेनवार गुरुजी यांना जबर मार लागून त्यांचा मृत्यू झाला.
या दुखद घटनेत देवाज्ञा झालेले दिलीप कोरपेनवार फक्त शिक्षकच नव्हे तर सामाजिक कार्यकर्ता, पर्यावरणवादी व स्वच्छतादूत म्हणून शहरात सुपरिचित होते. नगर सेवा समितीचे ते अध्यक्ष होते. त्यांच्या पुढाकाराने शहरात हजारो झाडे लावण्यात आले. नगर सेवा समितीच्या माध्यमातून शहराची साफसफाईची मोहीम मागील अनेक वर्षांपासून सुरु होती. अत्यंत मनमिळाऊ व साधेपणाचे दिलीप कोरपेनवार गुरुजी यांचा शहरात विविध धार्मिक, सामाजिक व शैक्षणिक कार्यात नेहमी सहभाग असायचा.
झरीजामणी तालुक्यातील अर्धवन या गावातील रहिवासी दिलीप कोरपेनवार हे मागील अनेक वर्षापासून वणी येथे स्थायिक झाले होते. रवीनगर भागात ते वास्तव्यास होते. त्यांच्या मागे वडील सेवानिवृत शिक्षक नारायणराव कोरपेनवार, दोन भाऊ, पत्नी, एक मुलगी, एक मुलगा व मोठा आप्त कुटुंब आहे. वरोरा येथील ग्रामीण रुग्णालयात पोस्टमार्टम व इतर प्रक्रिया पूर्ण करून त्यांचा मृतदेह वणी येथे त्यांचे राहते घरी रविनगर येथे आणण्यात येईल.
वणी टाईम्स तर्फे कोरपेनवार गुरुजी यांना भावपूर्ण श्रद्धांजली…🙏
