वणी टाईम्स न्युज : सायंकाळी शौचास जाण्यासाठी निघालेल्या एका इसमाला भरधाव येणाऱ्या दुचाकी चालकाने मागून जोरदार धडक दिली. या धडकेत पायदळ जाणारा इसम गंभीररित्या जखमी झाला. कायर व वणी येथे प्राथमिक उपचार करून चंद्रपूर येथे नेत असताना वाटेतच जखमी व्यक्तीचा मृत्यू झाला. शंकर हिरामन दंडाजे (45) रा. कृष्णानपूर असे या अपघातात मृत व्यक्तीचे नाव आहे. तर अनिल सुधाकर ठावरी, रा. कृष्णानपूर असे आरोपी दुचाकी चालकाचे नाव आहे.
सदर घटनेबाबत मृत इसमाचे पुत्र विकास शंकर दंडाजे यांनी दिलेल्या तक्रारीनुसार त्याचे वडील शंकर हिरामन दंडाजे हे ऑटो चालवतात. दिनांक 15 जून रोजी सायंकाळी 7.30 वाजता दरम्यान ते शौचास जाण्यासाठी कृष्णानपुर ते मोहदा रस्त्यावर जात असताना गावातीलच अनिल सुधाकर ठावरी याने त्याच्या ताब्यातील मोटरसायकल क्रमांक MH32 L 6402 ही भरधाव व निष्काळजीपणे चालवून त्याच्या वडिलांना धडक दिली. या अपघातात शंकर याच्या छाती व पायावर गंभीर मार लागला.
जखमी अवस्थेत स्थानिकांनी व त्यांच्या पत्नी अन्नपूर्णा यांनी मिळून प्रथम कायर येथील आरोग्य केंद्रात उपचारासाठी दाखल केले. त्यानंतर वणी ग्रामीण रुग्णालयात हलवण्यात आले. प्रकृती चिंताजनक असल्याने त्यांना पुढील उपचारासाठी चंद्रपूर येथे रेफर करण्यात आले होते. मात्र, चंद्रपूरकडे नेत असताना वाटेत त्यांची प्रकृती खालावली. शरीरात कोणतीही हालचाली होत नसल्याने शिरपूर येथील डॉक्टरांना दाखविले असता डॉक्टरांनी त्याला मृत घोषित केले. फिर्यादी विकास दंडाजे यांनी शिरपूर पोलीस ठाण्यात तक्रार दाखल केली असून अपघातास कारणीभूत मोटारसायकल चालक अनिल सुधाकर ठावरी, रा. कृष्णानपूर विरुद्ध कलम 106(1), 281 नुसार गुन्हा दाखल करण्यात आला. पुढील तपास शिरपूर पोलीस करीत आहे.
