वणी टाईम्स न्युज : पोलीस कर्मचाऱ्याचा मोबाईल नंबर न दिल्याच्या रागातून चौघांनी मिळून एका युवकाला बेदम मारहाण केली. एवढंच नव्हे तर एकाने रस्त्यावर धारदार दगड उचलून युवकाच्या कपाळावर मारून जखमी केले. उपचारानंतर फिर्यादी युवकांनी मुकुटबन पोलीस ठाण्यात दिलेल्या तक्रारीवरून पोलिसांनी मुकुटबन येथीलच चौघांविरुद्ध गुन्हा दाखल केला आहे.
पोलिस ठाण्यात दाखल रिपोर्टनुसार फिर्यादी विक्रम राजेश्वर पशिवार (28), रा. मुकूटबन असे जखमी व्यक्तीचे नाव असून तो मजुरीचे काम करतो. दिनांक 15 जून 2025 रोजी रात्री 10 वाजताच्या सुमारास तो मुकूटबन येथील वार्ड क्रमांक 3 मधील शबरी माता मंदिराजवळ बसलेला असताना गावातीलच श्रीनिवास चिल्कावार याने त्याला फोन करून पाण्याच्या टाकीजवळ बोलावले. विक्रम तेथे गेल्यावर श्रीनिवास याने त्याच्याकडून पोलिसांचा मोबाईल नंबर मागितला. विक्रमने “माझ्याकडे नंबर नाही” असे म्हटल असता “तू पोलीस ठाण्यात राहते आणि तुला नंबर माहिती नाही का’ आम्हाला शिकवते का ? अस म्हणून त्यांनी वाद घातला. तसेच फिर्यादीची कालर धरून पोलिसांना मी खिशात ठेवतो, अस म्हणत शिवीगाळ केली.
दरम्यान तिथे हजर श्रीनिवासचे मित्र गणपत नारायण तुनकीवार (35), प्रफूल कोंगलवार (23) व प्रविण तुनकीवार यांनीही वाद करून धमकी दिली. त्यानंतर गणपत तुनकीवार याने रस्त्यावरील धारदार गिट्टीचा दगड उचलून फिर्यादी विक्रमच्या कपाळावर मारला. या हल्ल्यात त्याचे कपाळ फूटले व रक्तस्त्राव झाला. फिर्यादी यांनी त्यांच्यापासून सुटका करून पळण्याचा प्रयत्न केला, मात्र पुन्हा पकडून त्याला मारहाण करण्यात आली. तसेच “पोलीस स्टेशनला गेला तर तुला मारून टाकू” अशी धमकीही देण्यात आली.
जखमी अवस्थेत फिर्यादी विक्रम पशीवार पोलीस स्टेशन मुकूटबन येथे पोहोचला व त्याला पुढील उपचारासाठी ग्रामीण रुग्णालय झरी येथे हलवण्यात आले. उपचारानंतर त्यांनी पोलीस ठाण्यात तक्रार दाखल करण्यात आली आहे. पोलिसांनी या प्रकरणी श्रीनिवास चिल्कावार, गणपत तुनकीवार, प्रफूल कोंगलवार व प्रविण तुनकीवार यांच्याविरुद्ध कलम 118(1), 3(5), 351 (2) व 352 नुसार गुन्हा दाखल करून तपास सुरू केला आहे.
