वणी टाईम्स न्युज | सार्वजनिक ठिकाणी धारदार शस्त्र घेऊन दहशत निर्माण करणाऱ्या दोन युवकांवर पोलिसांनी धडक कारवाई करत त्यांना अटक केली आहे. वणी व शिरपूर पोलीस ठाणे हद्दीत झालेल्या या दोन वेगवेगळ्या कारवायांमध्ये पोलिसांनी आरोपींकडून तलवार, कोयता व दुचाकी असा मुद्देमाल जप्त केला असून परिसरात खळबळ उडाली आहे.
पोलिसांना मिळालेल्या गोपनीय माहितीच्या आधारे वणी पोलिसांनी वणी-यवतमाळ मार्गावरील लालपुलिया परिसरातील साई ढाबा समोर सापळा रचला. यावेळी एका दुचाकीवर संशयास्पदरीत्या बसलेल्या युवकाची तपासणी करण्यात आली. अंगझडती घेतली असता त्याच्या शर्टच्या मागील बाजूस तब्बल 41 सेंटीमीटर लांबीचा धारदार कोयता लपवून ठेवलेला आढळून आला.
ताब्यात घेतलेल्या युवकाने आपले नाव विवेक संतोष सिकलवार (22), रा. सेवानगर, वणी असे सांगितले. पोलिसांच्या प्राथमिक तपासात तो कोणत्या तरी गंभीर गुन्ह्याच्या उद्देशाने शस्त्र बाळगून फिरत असल्याचा संशय व्यक्त करण्यात येत आहे. पोलिसांनी आरोपीकडून कोयता (किंमत अंदाजे 500 रुपये) व होंडा युनिकॉर्न दुचाकी क्रमांक MH-29 CAL 5109 (किंमत अंदाजे 50 हजार रुपये) असा एकूण 50 हजार 500 रुपयांचा मुद्देमाल जप्त केला.
दरम्यान, दुसऱ्या घटनेत शिरपूर पोलीस ठाणे हद्दीतील मोहदा ते कृष्णानपूर मार्गावर एक युवक हातात तलवार घेऊन फिरत असल्याची माहिती पोलिसांना मिळाली. माहितीच्या आधारे पोलीस उपनिरीक्षक धीरज गुल्हाने यांनी पोलिस पथकासह कारवाई करत संबंधित युवकाला ताब्यात घेतले. त्याच्याकडून 32 इंच लांबीची लोखंडी तलवार हस्तगत करण्यात आली. सदर युवकाने आपले नाव विक्रम रवींद्र निब्रड (23), रा. कृष्णानपूर असे सांगितले.
या दोन्ही प्रकरणांमध्ये आरोपी विवेक संतोष सिकलवार व विक्रम रवींद्र निब्रड यांच्याविरुद्ध अनुक्रमे वणी व शिरपूर पोलीस ठाण्यात शस्त्र अधिनियम कलम 4 व 25 तसेच महाराष्ट्र पोलीस अधिनियम कलम 135 अंतर्गत गुन्हे दाखल करण्यात आले आहेत. पुढील तपास वणीचे पोलीस निरीक्षक गोपाल उंबरकर व शिरपूरचे सहाय्यक पोलीस निरीक्षक संतोष मनवर यांच्या मार्गदर्शनाखाली सुरू आहे.
