वणी टाईम्स न्युज :– भारतीय जनता पार्टी वणी विधानसभा तर्फे पंडित दिनदयाल उपाध्याय यांच्या 110 व्या जयंतीचे औचित्य साधत तसेच माजी आमदार मा. श्री. संजीवरेड्डी बोदकुरवार यांच्या वाढदिवसाचा संयोग साधत दिनांक 25 सप्टेंबर 2025 रोजी विविध सामाजिक व सांस्कृतिक कार्यक्रमांचे आयोजन करण्यात आले.
🔻 सकाळी 6.30 वाजता छत्रपती शिवाजी महाराज बौक येथे “नमो युवा रन – नशा मुक्त भारत मॅरेथॉन स्पर्धा” घेण्यात आली. चार गटांत विभागून झालेल्या या स्पर्धेत जवळपास 250 विद्यार्थ्यांनी सहभाग घेतला. स्पर्धेनंतर विजेत्यांना बक्षिसांचे वितरण करण्यात आले. सकाळी 10 वाजता वणी शहरातील सर्व बुथवर पं. दिनदयाल उपाध्याय यांच्या प्रतिमेला हार अर्पण करून जयंती साजरी करण्यात आली.
🔻 दुपारी 12 वाजता वणी येथील एस.बी. हॉलमध्ये भव्य कार्यकर्ता मेळावा पार पडला. या मेळाव्याला आदिवासी विकास मंत्री महाराष्ट्र राज्य नामदार अशोक उईके, माजी वित्त मंत्री सुधीर मुनगंटीवार, माजी आमदार संजीवरेड्डी बोदकुरवार, माजी जिल्हाध्यक्ष तारेंद्र बोर्डे, राज्य परिषद सदस्य दिनकर पावडे, जिल्हा कामगार आघाडी अध्यक्ष विजय पिदुरकर, तसेच जिल्हा पदाधिकारी आणि विधानसभा क्षेत्रातील 1500 पदाधिकारी मोठ्या संख्येने उपस्थित होते.
या वेळी नामदार अशोक उईके यांनी पं. दिनदयाल उपाध्याय यांच्या जयंतीनिमित्त नमन करत सेवा पंधरवाडा अभियानाचे कौतुक केले. त्यांनी माजी आमदार संजीवरेड्डी बोदकुरवार यांना वाढदिवसाच्या शुभेच्छा देखील दिल्या. यावेळी माजी वनमंत्री सुधीर मुनगंटीवार यांनी आपल्या भाषणात पं. दिनदयाल उपाध्याय यांच्या जीवनचरित्राचा आढावा घेतला. “एकात्म मानववाद” या विचारसरणीवर प्रकाश टाकत कार्यकर्त्यांना समाजातील शेवटच्या घटकापर्यंत पोहोचून आनंद निर्माण करण्याचे आवाहन त्यांनी केले. यावेळी त्यांनी संजीवरेड्डी बोदकुरवार यांना 2029 च्या निवडणुकीतील भावी आमदार असे संबोधून त्यांचा आवाज विधानसभेत पोहोचविण्याची हमी दिली.
🔻 दुपारी 4 वाजता विठ्ठलवाडी येथील नगरपरिषद शाळा क्र. 7 च्या आवारात “एक पेड माँ के नाम” अभियानांतर्गत 75 वृक्षारोपण करण्यात आले. सायंकाळी 6 वाजता जैताई मंदिरात माजी आमदार संजीवरेड्डी बोदकुरवार व वणी शहर मंडळ अध्यक्ष ॲड. निलेश माया महादेवराव चौधरी यांच्या उपस्थितीत आरतीचे आयोजन झाले.
संपूर्ण कार्यक्रमाचे यशस्वी आयोजन करण्यासाठी वणी शहर मंडळ अध्यक्ष ॲड. निलेश माया महादेवराव चौधरी, जिल्हा सोशल मिडिया अध्यक्ष दीपक पाठणकर, शहर उपाध्यक्ष डॉ. रोहित बनकर, शहर सचिव राज गव्हाणे, युवा मोर्चा अध्यक्ष बालाजी भेदोडकर, शहर सहकोषाध्यक्ष ललित कचवे, हर्षल बिडकर व त्यांच्या कार्यकर्त्यांनी परिश्रम घेतले. कार्यक्रमाचे संचालन व आभारप्रदर्शन ॲड. निलेश माया महादेवराव चौधरी यांनी केले.
