वणी टाईम्स न्युज : परंपरागत अध्यापन पद्धती पलीकडे जात आधुनिक तंत्रज्ञान, शैक्षणिक मूल्ये आणि गुणवत्तापूर्ण शिक्षणाचा समन्वय साधणारी “Technology Led Excellence in Teaching” या विषयावरील एक दिवसीय शिक्षक कार्यशाळा लायन्स क्लब वणी व वणी लायन्स चॅरिटेबल ट्रस्ट यांच्या संयुक्त विद्यमाने लायन्स इंग्लिश मीडियम स्कूल, देशमुखवाडी, वणी येथे उत्साहपूर्ण वातावरणात यशस्वीरीत्या पार पडली.
कार्यक्रमाची सुरुवात संत गाडगेबाबा यांच्या प्रतिमेला पुष्पहार अर्पण करून करण्यात आली. समाजप्रबोधन, स्वच्छता व शिक्षणाबाबतचे त्यांचे विचार आजच्या आधुनिक शिक्षणव्यवस्थेतही तितकेच उपयुक्त असल्याचे मत यावेळी व्यक्त करण्यात आले. उद्घाटनप्रसंगी प्रमुख पाहुणे म्हणून लायन्स चॅरिटेबल ट्रस्टचे अध्यक्ष व माजी आमदार संजीवरेड्डी बोदकुरवार उपस्थित होते. शिक्षणात तंत्रज्ञानाचा स्वीकार करताना मानवी मूल्ये, संस्कार व सामाजिक जाणीव यांची सांगड घालणे आवश्यक असून विद्यार्थ्यांचा सर्वांगीण विकास केंद्रस्थानी ठेवावा, असे त्यांनी प्रतिपादन केले.
कार्यशाळेच्या पहिल्या सत्रात डॉ. हरिओम पुण्यानी (नागपूर) यांनी “Excellence in Teaching” या विषयावर मार्गदर्शन केले. शिक्षक हे केवळ अभ्यासक्रम पूर्ण करणारे नसून विद्यार्थ्यांचे व्यक्तिमत्त्व घडविणारे शिल्पकार असल्याचे त्यांनी नमूद केले. अध्यापनात नावीन्य, संवेदनशीलता, सकारात्मक संवाद व आत्मपरीक्षण यांचे महत्त्व स्पष्ट करत, महात्मा गांधींच्या ‘नई तालीम’ संकल्पनेचा संदर्भ देत विद्यार्थ्यांचे मूल्यमापन कौशल्याधारित असावे, असे त्यांनी सांगितले. बदलत्या काळात शिक्षकांनी डिजिटल साक्षर व तंत्रस्नेही बनणे आवश्यक असल्याचेही त्यांनी अधोरेखित केले.
दुसऱ्या सत्रात डॉ. कौशिक जोशी (अमरावती) यांनी “AI and Teaching Excellence” या विषयावर सादरीकरण केले. कृत्रिम बुद्धिमत्ता व डिजिटल साधनांच्या साहाय्याने शिक्षण अधिक प्रभावी, रंजक व सहभागात्मक कसे करता येईल, याचे प्रात्यक्षिकांसह सविस्तर विवेचन त्यांनी केले. तसेच शिक्षक, विद्यार्थी व पालक यांच्यात सातत्याने सकारात्मक संवाद असणे गरजेचे असल्याचे त्यांनी सांगितले.
ही संपूर्ण कार्यशाळा शिस्तबद्ध व नियोजनपूर्वक पार पडली. प्रभावी वक्ते आणि अभ्यासपूर्ण मांडणीमुळे उपस्थित शिक्षकांना नवी दिशा व प्रेरणा मिळाली. या कार्यशाळेत लायन्स इंग्लिश मीडियम हायस्कूल व कनिष्ठ महाविद्यालयासह मॅकरून स्टुडंट अकॅडमी, ब्लॅक डायमंड इंटरनॅशनल स्कूल, संताजी इंग्लिश मीडियम स्कूल, सुशगंगा पब्लिक स्कूल, मार्कंडेय पोद्दार लर्न स्कूल व न्यू व्हिजन इंग्लिश मीडियम स्कूलचे शिक्षक सहभागी झाले होते.
कार्यक्रमाचे संचालन सौ. पंपा मित्रा यांनी केले. प्रास्ताविक प्राचार्य डॉ. प्रसाद खानझोडे यांनी केले तर आभार प्रदर्शन डॉ. अभिजित अणे यांनी केले. समारोपप्रसंगी मान्यवर वक्त्यांचा शाल व श्रीफळ देऊन सन्मान करण्यात आला. यावेळी लायन्स क्लब वणीचे अध्यक्ष लायन तुषार नगरवाला यांच्यासह शिक्षण व सामाजिक क्षेत्रातील अनेक मान्यवर उपस्थित होते. शिक्षण क्षेत्रात सकारात्मक परिवर्तनाची प्रेरणा देणारी ही कार्यशाळा वणीच्या शैक्षणिक वातावरणाला नवा दृष्टिकोन व नवचैतन्य देणारी ठरली.
