वणी टाईम्स न्युज : जिल्हा पोलीस दलातील एका पोलिस हवालदाराचा हृदयाघाताच्या धक्क्याने मृत्यू झाल्याची धक्कादायक घटना समोर आली आहे. उमेश विठ्ठलराव डोंगरे (43) रा. काळे लेआऊट,वणी असे मृत पोलिस कर्मचाऱ्याचे नाव आहे. उमेश डोंगरे हे मुकुटबन पोलीस स्टेशन येथे हेड कॉन्स्टेबल पदावर कार्यरत होते.
शनिवार 6 सप्टेंबर रोजी त्यांची पोलीस स्टेशन डायरीवर ड्युटी होती. मात्र तब्येत बरी वाटत नसल्याने त्यांनी सुट्टी घेऊन पत्नीसह नागपूर येथे दवाखान्यात गेले. माहितीनुसार डॉक्टरांनी त्यांना रविवारी येण्याचे सांगितले. त्यामुळे दोघ पती पत्नी नागपूर येथेच मुक्कामी राहिले. दुसऱ्या दिवशी दवाखान्यात जाण्यापूर्वीच उमेश यांना हृदयाघाताचा जोरदार झटका बसला आणि त्याची प्राणज्योत मावळली.
नागपूर येथे शवविच्छेदनानंतर हवालदार उमेश डोंगरे यांचा मृतदेह वणी येथे आणण्यात येईल. सायंकाळी 5 वाजता वणी येथील मोक्षधामात जिल्हा पोलीस दलाकडून शोक सलामी देऊन शासकीय इतमामात त्यांच्यावर अंत्यसंस्कार करण्यात येणार असल्याची माहिती आहे.
