वणी टाईम्स न्युज : वर्धा नदी पात्रात झोला गावालगत अवैध रेती घाटावर वणी तहसीलदारांनी टाकलेली धाड संशयाच्या भोवऱ्यात सापडली आहे. 6 एप्रिल 2025 रोजी रात्री 2 वाजता महसूल कार्यालयातील एका कर्मचाऱ्यासोबत स्वतः तहसीलदार निखिल धुळधर यांनी टाकलेल्या या धाडीत एक पोकलेन मशीन व हायवा ट्रक जप्त करण्यात आले. धाडीच्या ठिकाणी सहकाऱ्यांनी काढलेल्या फोटोमध्ये तहसीलदार यांच्या पासून काही मीटर अंतरावर हायवा जवळ एक रेती तस्कर उभा असल्याचे फोटो सोशल मीडियावर व्हायरल झाले होते. तसेच सदर ठिकाणी अवैधरीत्या हजारों ब्रास रेती उपसा केल्याने नदी पात्रात मोठे मोठे खड्डे तयार झाल्याचे तहसीलदार यांनी स्वतः पाहिले.
सदर धाडी दरम्यान रेती उपसा, वाहतूक व रेती तस्कर मिळून आल्याचे भक्कम पुरावे असताना महसूल अधिकाऱ्यांनी त्या रेती तस्करावर फौजदारी कार्यवाही न करता फक्त दंडात्मक कार्यवाही केली. विशेष म्हणजे नदी पात्रातून करोडो रुपयांची रेती चोरीला गेली असता संबंधित साजाचे मंडळ अधिकारी व तलाठी यांच्यावर कोणतीही कारवाई करण्यात आली नाही. त्यामुळे तहसीलदारांनी टाकलेली धाड पूर्व नियोजित (Pre-planned )असल्याचे आरोप करण्यात येत आहे.
नुकतेच सामाजिक कार्यकर्ता रवींद्र कांबळे व युवासेना उप जिल्हा अधिकारी अजिंक्य शेंडे यांनी वर्धा नदी पात्रातून हजारो ब्रास रेती चोरीसाठी संबंधित साज्याचे मंडळ अधिकारी व तलाठी जबाबदार असून त्यांच्यावर कारवाईची मागणी केली आहे. याबाबत रवींद्र कांबळे यांच्या पत्राच्या संदर्भाने उप विभागीय अधिकारी डॉ. नितीन हिंगोले यांनी 2 मे 2025 रोजी तहसीलदार वणी यांना पत्र देऊन मंडळ अधिकारी जयंती झाडे व तलाठी कुणाल आडे यांच्यावर प्रचलित नियमानुसार कार्यवाही करण्याचे आदेश दिले. तर युवासेना उप जिल्हा अधिकारी अजिंक्य शेंडे यांनी थेट चंद्रकांत बावनकुळे यांना पत्र देऊन तहसीलदार वणी यांनी झोला घाटावर टाकलेल्या धाडीची चौकशी करणे तसेच मंडळ अधिकारी व तलाठी यांना निलंबित करण्याची मागणी केली आहे.
