वणी टाईम्स न्युज: वणी नगरपालिकेच्या निवडणुकीची रणधुमाळी सुरू झाली असून, नगरपालिका काबीज करण्यासाठी शिवसेना (शिंदे गट) पक्षाकडून जोरदार तयारी सुरू आहे. पक्षाच्या उमेदवारीसाठी इच्छुक कार्यकर्त्यांच्या मुलाखती १० नोव्हेंबर रोजी दुपारी ३ ते सायं. ८.३० वाजेपर्यंत विनायक मंगल कार्यालय, वणी येथे आयोजित करण्यात आल्या आहेत.
या मुलाखतीदरम्यान जिल्हा समन्वयक विश्वास नांदेकर, जिल्हा संघटक विजय बाबू चोरडिया आणि शिवसेना नेते विनोद मोहितकर उपस्थित राहणार असून, नगरपालिकेच्या सर्व २९ प्रभागांसाठी संभाव्य उमेदवारांचा तपशील तपासला जाणार आहे.
वणीसह संपूर्ण यवतमाळ जिल्ह्यात पक्षसंघटन बळकट करण्यासाठी शिवसेनेने निवडणुकीपूर्व मोहिमेला गती दिली आहे. जिल्हा संघटक विजय चोरडिया यांनी दिलेल्या माहितीनुसार, “नगरपालिका क्षेत्रातील इच्छुक कार्यकर्त्यांनी आपला अर्ज नमुन्यानुसार सादर करावा. त्यामध्ये कार्यकर्त्यांचा वैयक्तिक तपशील, पक्षातील कार्याचा अनुभव, स्थानिक जनसंपर्काची माहिती तसेच सामाजिक कार्याचा उल्लेख आवश्यक आहे.” हे अर्ज पक्ष कार्यालयात उपलब्ध करून देण्यात आले आहेत.
शिवसेना (शिंदे गट)तर्फे सध्या दररोज नवीन कार्यकर्त्यांचे पक्षप्रवेश सुरू असून, अनेक स्थानिक कार्यकर्ते व नागरिक उत्साहाने शिवसेनेत दाखल होत आहेत. विश्वास नांदेकर, विजय चोरडिया आणि विनोद मोहितकर यांच्या नेतृत्वाखाली पक्षात नवचैतन्य निर्माण झाले आहे.
स्थानिक स्वराज्य संस्थांच्या आगामी निवडणुकांना लक्षात घेता पक्षाने संघटनात्मक तयारी आणि इच्छुकांच्या निवडीची प्रक्रिया गतिमान केली आहे. दररोजच्या पक्षप्रवेशामुळे शिवसेनेची ताकद वाढत असून, वणी नगरपालिकेच्या निवडणुकीत शिवसेना (शिंदे गट) भक्कम लढत देईल, असा विश्वास स्थानिक पातळीवर व्यक्त केला जात आहे.
