वणी टाईम्स न्युज: वणी नगर परिषद निवडणुकीसाठी नामांकन दाखल करण्याची उद्या आखरी तारीख आहे. मात्र तत्पूर्वी रविवार 16 नोव्हेंबर रोजी भारतीय जनता पार्टीच्या उमेदवारानी नामांकन रॅली काढून केलेल्या शक्तीप्रदर्शनामुळे विरोधी पक्षांना धडकी भरली आहे. नामांकन रॅलीमध्ये सहभागी महिला पुरुषांची संख्येने शहरवासीयांचे लक्ष वेधले होते.
नामांकन दाखल करण्यासाठी भाजपचे वरिष्ठ नेते व पदाधिकाऱ्यांसह उमेदवारानी श्री रंगनाथ स्वामी देवस्थान येथून हजारों समर्थकांसह शहरात भव्य रैली काढून निवडणूक कार्यालयात पोहचून आपले नामांकन दाखल केले. नुकतेच महाराष्ट्र नवनिर्माण सेनेमधून भाजप मध्ये प्रवेश करणारे अंकुश बोढे यांनी प्रभाग 9 मधून उमेदवारी अर्ज दाखल केला.
या शक्ती प्रदर्शन रेलीमध्ये माजी आमदार संजीवरेड्डी बोदकुरवारसह, शहर अध्यक्ष ऍड. निलेश चौधरी, माजी जिल्हाध्यक्ष तारेंद्र बोर्डे, विजय पिदुरकर, दिनकर पावडे, गजानन विधाते, भाजप जिल्हा उपाध्यक्ष रवी बेलुरकर, संजय पिंपळशेंडे,.कुणाल चोरडिया, अंकुश बोढे, नगर परिषदचे माजी उपाध्यक्ष श्रीकांत पोटदुखे, अनुराग काठेड, अनुप राठी, मयुर गोयनका तसेच भाजपचे इतर पदाधिकारी, प्रभाग प्रभारी व शहरातील 14 प्रभागासाठी उभे 29 उमेदवार सहभागी झाले होते.
इतर पक्षांचे सूत जुळेना, भाजपने मारली बाजी
नगर परिषद निवडणुकीत उमेदवार ठरविण्यावरून महाविकास आघाडीचे सूत जुळता जुळेना.. मात्र या सर्वांपुढे भारतीय जनता पक्षाने बाजी मारून नगराध्यक्ष सह सर्व नगरसेवकांचे नामांकन दाखल केले. शिवसेना (उबाठा) आणि काँग्रेस मध्ये अद्याप उमेदवारांची संख्या निश्चित झाली नाही. तर राष्ट्रवादी (शरद पवार) व वंचित बहुजन आघाडीने स्वतंत्रपणे निवडणूक लढण्याची घोषणा केली आहे. मनसेने नगर परिषद निवडणुकीतून माघार घेतली आहे. दुसरीकडे भाजपने मात्र आपले सर्व उमेदवार निवडणूक मैदानात उतरवले आहे.
भाजपने दाखवला अनेक नगरसेवकांना बाहेरचा रस्ता..
2019 मध्ये निवडणून आलेल्या बहुतांश नगरसेवकांना यावेळी भाजपने बाहेरचा रस्ता दाखवला आहे. यातील काही नगरसेवक निष्क्रीय तर काहींनी विधानसभा निवडणुकीत पक्षविरोधी काम केल्याचे बोलले जाते. ज्या नगर सेवकांना भाजपने यंदा तिकीट नाकारले, त्यांनी इतर पक्षाची कास धरली आहे. मात्र त्यांच्या जाण्याने भारतीय जनता पक्षाला काही फरक पडणार नाही. असा राजकीय जाणकारांचा मत आहे.
