वणी टाईम्स न्युज: वणी विधानसभेचे माजी आमदार दिवंगत विश्वासभाऊ नांदेकर यांचे पार्थिव शरीराचे मंगळवार 23 डिसेंबर रोजी त्यांचे मूळ गाव पठारपूर येथे त्यांचे शेतात अंत्यसंस्कार करण्यात आले. दिवंगत नांदेकर यांना त्यांच्या पुतण्या विशाल नांदेकर यांनी मुखाग्नी दिली. यावेळी सर्व राजकीय पक्षातील नेते, पदाधिकारी, कार्यकर्ता, पठारपूर येथे रहिवासी तसेच हजारोंच्या संख्ये कार्यकर्ता व नांदेकर समर्थक उपस्थित होते.
शिवसेनेचे माजी आमदार विश्वास नांदेकर यांचा 21 डिसेंबर रोजी रात्री मुंबई येथील लीलावती रुग्णालयात निधन झाले होते. मुंबई येथून त्यांचे पार्थिव ॲम्ब्युलन्स मध्ये वणी येथे आणण्यात आले. त्यानंतर मंगळवारी सकाळी 9.30 वाजता एका सजविलेल्या वाहनात शेकडो गाड्यांच्या ताफ्यासह पार्थिव त्यांचे मूळ गाव पठारपूर येथे नेण्यात आले. दरम्यान टिळक चौक, गणेशपूर, पेटुर, कायर या गावातील नागरिकांनी रस्त्यावर उभे राहून दिवंगत नांदेकर यांना श्रद्धांजली वाहिली.
पठारपूर येथे त्यांचे राहते घरी शेवटच्या विधी पूर्ण करण्यात आल्या. त्यानंतर पालकमंत्री संजय राठोड, माजी केंद्रीय मंत्री हंसराज अहीर, खासदार प्रतिभा धानोरकर, आमदार संजय देरकर, माजी आमदार वामनराव कासावार, माजी आमदार संजीवरेड्डी बोदकुरवार, राजुरा विधानसभेचे माजी आमदार सुदर्शन निमकर, मनसे नेता राजु उंबरकर, शिवसेना (शिंदे) गटाचे यवतमाळ जिल्हा संघटक विजय चोरडिया, काँग्रेस नेते संजय खाडे यांनी त्यांच्या पार्थिव देहावर श्रद्धासुमन अर्पित केले.
अंत्यसंस्काराच्या वेळी सर्व मान्यवरांनी श्रद्धांजलीपर मनोगत व्यक्त केले. अंत्यसंस्कार दरम्यान शासकीय प्रतिनिधी म्हणून वणीचे उप विभागीय अधिकारी डॉ. नितीन हिंगोले, तहसीलदार निखिल धूळधर उपस्थित होते. यावेळी मध्ये मोठ्या संख्येने नागरिकांची हजेरी लक्षात घेता पोलिस व वाहतूक पोलिसांनी चोख पोलीस बंदोबस्त ठेवला होता. येणाऱ्या लोकांचे वाहने उभे करण्यासाठी पठारपूर गावालगत एका शेतात पार्किंग स्थळ तयार करण्यात आले होते.
