वणी टाईम्स न्युज | शहरातील सावरकर चौक परिसरातील घरासमोर उभ्या एसयूवी कारची तोडफोड केल्याची घटना गुरुवार 7 ऑगस्ट रोजी पहाटे 4.45 वाजता सुमारास घडली. घटनेबाबत फिर्यादी कार मालक अब्दुल सादिक अब्दुल हमीद (34) वर्ष, रा. सावरकर चौक वणी यांनी दिलेल्या तक्रारीवरून वणी पोलीस ठाण्यात दोघांविरुद्ध गुन्हा दाखल करण्यात आला आहे. मंगल खाडे व सय्यद मिनाज सय्यद मुमताज दोघं राह. वणी असे आरोपीचे नाव आहे.
तक्रारदार अब्दुल सादिक अब्दुल हमीद यांनी पोलिसांना दिलेल्या तोंडी तक्रारीत नमूद केल्याप्रमाणे, त्यांच्याकडे महिंद्रा XUV 700 क्रमांक MH 34 BV 9313 ही चारचाकी गाडी असून ती त्यांचे भाचा नेहान शेख वाहब शेख यांच्या नावावर आहे. नेहमीप्रमाणे त्यांनी दिनांक 7 ऑगस्ट रोजी पहाटे 4 वाजता ही गाडी घरासमोर पार्क करून घरात गेले. काही वेळातच, अंदाजे 4.45 वाजताच्या सुमारास गाडीचा काचा फुटल्याचा आवाज आल्याने त्यांनी बाहेर येऊन पाहणी केली.
त्यावेळी त्यांनी पाहिले की, गाडीची समोरील काच लाकडी बल्लीने फोडण्यात आली होती. याबाबत शेजाऱ्यांकडून माहिती मिळाली की, मंगल खाडे, रा. मंगलम पार्क, चिखलगाव वणी व सय्यद मिनाज सय्यद मुमताज रा. शास्त्री नगर वणी यांनी मिळून हा प्रकार केला. दोघांनी मिळून गाडीचे समोरील काचच नव्हे तर गाडीच्या बोनटवर आणि काचांच्या फ्रेमवरही बल्लीने प्रहार केले. त्यामुळे बोनाट चपकून गाडीचे अंदाजे ₹40 हजार ते ₹50 हजारांचे नुकसान झाले आहे.
यापूर्वीही अंदाजे पाच वर्षांपूर्वी मंगल खाडे याने त्यांना मारहाण करून जीवे मारण्याची धमकी दिली होती, त्यावेळीही पोलीस ठाण्यात तक्रार दाखल करण्यात आली होती. असे तक्रारीत नमूद केले आहे. तसेच दोन दिवसांपूर्वीच फिर्यादीचे गाडीचे ड्रायव्हर राकेश शंकर शेवंतलवार याच्याशी मंगल खाडे व सय्यद मिनाज यांनी पानटपरीवर वाद घालत तुझ्या मालकाला सांग, त्याची गाडी फोडून टाकू किंवा ट्रकखाली टाकून देऊ, अशी धमकी दिल्याचे सांगण्यात आले.
विशेष म्हणजे घटनेनंतर सकाळी 6:30 वाजता मंगल खाडे हा पुन्हा तक्रारदाराच्या घराजवळ चक्कर मारताना दिसला व त्याने तक्रारदाराचे मित्र कुणाल बुरेवार रा. नृसिंह आखाडा जवळ वणी याला‘अभी तो शुरुआत है, आगे देखना क्या होता है’अशी धमकी दिल्याचेही तक्रारीत नमूद आहे. तक्रारीवरून पोलिसांनी आरोपी मंगल खाडे, रा. मंगलम पार्क, चिखलगाव वणी व सय्यद मिनाज सय्यद मुमताज रा. शास्त्री नगर वणी विरुद्ध कलम 324(2), 352, 351(2) नुसार गुन्हा दाखल केला आहे. पुढील तपास वणी पोलीस करीत आहे
