वणी टाईम्स न्युज | जिल्ह्यातील मारेगाव येथील घरफोडी प्रकरणात फरार असलेल्या आरोपीस स्थानिक गुन्हे शाखेच्या पथकाने ताब्यात घेत मोठी कारवाई केली आहे. या कारवाईदरम्यान आरोपीकडून आणखी एक घरफोडीचा गुन्हा उघडकीस आणण्यात आला असून, सुमारे ९.३० लाख रुपये किमतीचे सोन्या-चांदीचे दागिने जप्त करण्यात आले आहेत.
स्थानिक गुन्हे शाखेकडील पथकाने यापूर्वी २१ एप्रिल २०२६ रोजी मारेगाव पोलीस ठाण्यातील गुन्हा क्र. १४२/२०२६ अन्वये कारवाई करत २१ लाखांहून अधिक किमतीचा मुद्देमाल जप्त केला होता. या गुन्ह्यात दोन विधीसंघर्षग्रस्त बालकांसह इतर आरोपी निष्पन्न झाले होते. मात्र, नथ्थु नागु कुरकुटे (वय ३०, रा. मोहदरी, ता. उमरखेड, जि. यवतमाळ) हा आरोपी फरार होता.
दरम्यान, १ मे २०२६ रोजी आरोपी पुसद–उमरखेड मार्गावरील कोपरा फाटा परिसरात असल्याची खात्रीलायक माहिती पथकाला मिळाली. त्यानुसार सापळा रचून कोपरा फाटा येथील ‘भारत फर्निचर’ दुकानासमोरून आरोपीस ताब्यात घेण्यात आले. चौकशीदरम्यान त्याच्याकडून सोन्या-चांदीचे दागिने जप्त करण्यात आले.
सखोल चौकशीत आरोपीने नागवाडी येथील दत्ता कुरकुटे व इतर दोन विधीसंघर्षग्रस्त बालकांच्या मदतीने मारेगाव येथे सुमारे दोन महिन्यांपूर्वी चोरी केल्याची कबुली दिली. तपासात हे दागिने मारेगाव पोलीस ठाण्यातील गुन्हा क्र. १६०/२०२६ (कलम ३०५ (अ)) मधील असल्याचे निष्पन्न झाले. जप्त करण्यात आलेल्या मुद्देमालाची किंमत ९,३०,३०८ रुपये इतकी आहे. सदर आरोपी व मुद्देमाल पुढील तपासासाठी मारेगाव पोलीस ठाण्याच्या ताब्यात देण्यात आला आहे.
ही कारवाई पोलीस अधीक्षक कुमार चिंता, अपर पोलीस अधीक्षक अशोक थोरात यांच्या मार्गदर्शनाखाली स्थानिक गुन्हे शाखेचे पोलीस निरीक्षक सतीश चवरे यांच्या नेतृत्वात पार पडली. पथकात सहायक पोलीस निरीक्षक दत्ता पेंडकर, पोलीस उपनिरीक्षक धनराज हाके तसेच पोलीस कर्मचारी सुनिल खंडागळे, सुधीर पांडे, सुभाष जाधव, संतोष भोरगे, तेजाब रणखांब, रजनिकांत मडावी आणि चालक सतीश फुके यांचा सहभाग होता.
