वणी टाईम्स न्यूज | मारेगाव तालुक्यात वाळू तस्करी करणाऱ्यांविरोधात पोलिसांनी पुन्हा एकदा कडक कारवाई करत मध्यरात्री धडक घातली. पांढरकवडा उपविभागीय पोलीस अधिकारी (SDPO) रॉबिन बन्सल यांनी स्वतः पुढाकार घेत, करणवाडी फाट्याजवळून जात असलेला अवैध वाळूने भरलेला टिप्पर रंगेहाथ पकडला. ही कारवाई 5 ऑगस्टच्या मध्यरात्री 1.45 वाजता पार पडली.
सदर टिप्पर (MH36-F1820) हा मारेगाव कडून करंजीच्या दिशेने संशयास्पदरीत्या जाताना दिसला. बन्सल यांना गाडीवर संशय येताच त्यांनी गाडी थांबवून झडती घेतली असता, त्यामध्ये 3 ब्रास रेती अवैधरित्या भरलेली असल्याचे निष्पन्न झाले. चालकाकडे ना कोणतेही रेती वाहतुकीचे परवाने होते, ना गाडीची कागदपत्रे. यानंतर पोलीस स्टेशन मारेगाव यांना तातडीने सूचना देत पंचासमक्ष सदर टिप्पर व रेतीसह मुद्देमाल जप्त करण्यात आला.
पोलिसांनी टिप्पर क्रमांक MH36-F1820 मूल्य सुमारे ₹5 लाख व रेती अंदाजे 3 ब्रास, मूल्य ₹15 हजार असा एकूण ₹5 लाख 15 हजाराचा मुद्देमाल जप्त केला.या प्रकरणी पोलीस हेड कॉन्स्टेबल रवी सुरेशराव सिंहे (SDPO कार्यालय पांढरकवडा) यांनी फिर्याद दिली असून, त्यावरून मारेगाव पोलीस ठाण्यात आरोपी ट्रक चालक महेश रघुनाथ कोवे (27), रा. नरसाळा, ता. मारेगाव व ट्रक मालक सूरज प्रकाश टोंगे (35), रा. वेगाव, ता. मारेगाव विरुद्ध भादंवि कलम 303(2), 49, मोटर वाहन कायदा 130/177, महाराष्ट्र जमीन महसूल संहिता 1966 चे कलम 48 नुसार गुन्हा दाखल करण्यात आला आहे. पुढील तपास मारेगाव पोलिसांकडे सुरू आहे
➤ कारवाई मागील घटनाक्रम:
पांढरकवडाचे उप विभागीय पोलीस अधिकारी रॉबिन बन्सल हे जिल्हा गस्त दौऱ्यावर असताना मारेगाव पोलीस ठाण्यात भेट देऊन रात्री 1.20 वाजता परतत होते. त्यावेळी करणवाडी फाट्याजवळ एक टिप्पर संशयास्पदरित्या मारेगाव कडून करंजीच्या दिशेने जाताना दिसून आला. अनुभव आणि निरीक्षणाच्या जोरावर बन्सल यांनी तत्काळ गाडी थांबवून तपासणी केली आणि अवैध रेती वाहतूक उघडकीस आणली.
➤ निष्कर्ष:
ही कारवाई अवैध वाळू उत्खनन व वाहतुकी विरोधात पोलिसांची शून्य सहनशीलता दर्शवते. SDPO रॉबिन बन्सल यांची तत्परता आणि दक्षतेमुळे लाखोंचा अवैध रेती व्यवहार रोखण्यात यश आले असून, या कारवाईची परिसरात स्तुती केली जात आहे.
