वणी टाईम्स न्युज : कोलवाशरी मधून रिजेक्ट झालेल्या कोळशाची वणी परिसरात अवैधरित्या साठवणूक व विक्री होत असल्याची माहितीवरून यवतमाळ येथील LCB पथकाने लालपुलिया परिसरातील काही कोळसा डेपोंची तपासणी केली. गुणवत्ता तपासणीसाठी पोलिसांनी या कोळसा प्लॉटवरून कोळशाचे नमुना गोळा केले. पोलिसांच्या या कारवाईमुळे रिजेक्ट कोळशाचा काळा धंदा करणाऱ्या व्यापाऱ्यांचे धाबे दणाणले आहेत.
प्राप्त माहितीनुसार वणी शहरातील लालपुलिया परिसरातील काही कोळसा व्यापारी हे छत्तीसगड येथून स्वस्त दरात “रिजेक्ट कोल” खरेदी करून तो चांगल्या कोळशात मिसळून खुलेआम विक्री करत असल्याची खात्रीशीर जिल्हा पोलिस अधीक्षक यांना मिळाली होती. माहितीवरून यवतमाळ येथील स्थानिक गुन्हा शाखा पथकाने बुधवारी लालपुलिया परिसरातील काही कोळसा प्लॉटवर सर्चिंग ऑपरेशन राबवून कोळशाचे सँपल जप्त केले.
गव्हर्नमेंट ऑफ इंडिया, मिनिस्ट्री ऑफ कोल यांच्या नियमानुसार, प्रदूषणकारक असलेल्या रिजेक्ट कोलची विक्री ही केवळ निर्धारित‘एंड युझर’ लाच करण्याची परवानगी आहे. खुल्या बाजारात त्याची विक्री करण्यास स्पष्ट मनाई आहे. तरी छत्तीसगडमधील काही कोल वॉशरीज तसेच नागपूर, चंद्रपूर व वणी येथील काही स्थानिक व्यापारी गेल्या काही दिवसांपासून नियमांचे उल्लंघन करून रिजेक्ट कोलचे अवैधरीत्या ट्रान्सपोर्ट आणि विक्री करत असल्याचे उघड झाले आहे.
याबाबत स्थानिक प्रशासनाने उशीरा का होईना, पण गंभीर दखल घेतली आहे पोलीस अधीक्षक कुमार चिंता यांच्या आदेशाने यवतमाळ पोलिसांचे पथक बुधवारी सकाळी लालपुलीया येथे दाखल झाले. या पथकाकडून काही कोल डेपोची तपासणी करुन कोळशाचे नमुने गोळा करण्यात आले. संबंधित प्रकरणाचा पुढील तपास सुरू असून, या अवैध व्यापारामागे असलेल्या व्यक्तींची नावे प्रशासन लवकरच जाहीर करेल, अशी अपेक्षा व्यक्त केली जात आहे. स्थानिक गुन्हा शाखेच्या या कारवाईनंतर स्थानिक पातळीवर कोळसा तस्करी व मिलावटी कोळसा करणाऱ्या नागपूर येथील काही व्यापाऱ्यांवर कारवाई होण्याची शक्यता वर्तवली जात आहे.
