वणी टाईम्स न्युज: सोशल मीडियाच्या माध्यमातून मैत्री करून, एक महिलेला नग्न होण्यास भाग पाडून तिचा व्हिडीओ बनवून तो दुसऱ्याला पाठवणाऱ्या नराधमाविरुद्ध वणी पोलीस स्टेशनमध्ये गंभीर स्वरूपाचा गुन्हा दाखल करण्यात आला आहे. हा प्रकार वाघदरा, ता. वणी येथे 8 जून रोजी सायंकाळी 7 वाजताच्या सुमारास घडला.
पोलिसांनी दिलेल्या माहितीनुसार, फिर्यादी महिलेने तक्रार दिली की, आरोपी वाजिद हुसेन (39) रा. मोमीनपुरा वणी याने तिला फेसबुकवर फ्रेंड रिक्वेस्ट पाठवून संपर्क वाढविला. दोघांमध्ये मोबाईलवर संभाषण सुरू झाले. त्याच दरम्यान आरोपीने महिलेला व्हिडीओ कॉलवर कपडे काढण्यास भाग पाडले. त्याने “जर तू माझी मागणी पूर्ण केली नाही तर तुझ्या पतीला आपल्या प्रेमसंबंधांची माहिती देईन” अशी धमकी देत तिचा मानसिक छळ केला.
त्या भीतीपोटी पिडीत महिला व्हिडीओ कॉलवर नग्न झाली. त्यावेळी आरोपीने तिचा व्हिडीओ रेकॉर्ड करून दुसऱ्या व्यक्तीच्या मोबाईलवर पाठविला. यानंतर दिनांक 8 जून रोजी सायंकाळी पुन्हा फोन करून “माझ्याशी शारीरिक संबंध ठेव नाहीतर तुझे नग्न फोटो नातेवाईकांना व्हायरल करतो,” अशी धमकी देत जिवे मारण्याचा इशाराही दिला.
या गंभीर प्रकारावरून महिलेच्या तक्रारीनुसार आरोपीवर भारतीय न्याय संहिता कलम 75, 77, 351(2) BNS सहकलम 66(E) आयटी कायदा अंतर्गत गुन्हा नोंदवण्यात आला आहे. या प्रकरणाचा तपास पोलीस निरीक्षक गोपाल उंबरकर, पो.स्टे. वणी करीत आहेत. संपर्कात आलेल्या महिलांना ब्लॅकमेल करण्याच्या वाढत्या प्रकारामुळे सोशल मीडियावर मैत्री करताना सावधगिरी बाळगावी. असे आवाहन पोलिस निरीक्षक गोपाल उंबरकर यांनीं केले आहे.
