वणी टाईम्स न्युज : घर बांधण्यासाठी माहेरून 5 लाख रुपये आणणे तसेच मुळबाळ होत नसल्याने पती व सासू सासरे कडून सतत शारीरिक व मानसिक छळ होत असल्याची तक्रार विवाहितेने वणी पोलीस ठाण्यात केली आहे. तक्रारीवरून वणी पोलिसांनी शहरातील एका भागात वास्तव्यास पती विशाल तसेच सासू, सासरे विरुद्ध गुन्हा दाखल केला आहे.
तक्रारीनुसार, फिर्यादी महिलेचे विवाह काही वर्षांपूर्वी व्यवसायाने फोटोग्राफर असलेले विशाल सोबत पारंपरिक पद्धतीने झाले. सुरुवातीच्या काळात संसार सुरळीत सुरू होता. मात्र, काही महिन्यांनंतर पतीच्या व्यसनाधीनतेमुळे घरगुती वाद वाढले. चारित्र्यावर संशय घेत मारहाण व शिवीगाळ केल्याचा आरोप तक्रारीत करण्यात आला आहे.
तसेच, सासरच्या मंडळींकडून प्लॉट घेण्याकरिता माहेरहून पैसे आणण्यासाठी वारंवार तगादा लावण्यात येत असल्याचे, तसेच लग्नाला 6 वर्षं होऊन मुलबाळ झाले नसल्याने शारीरिक व मानसिक छळ करण्यात येत असल्याचे नमूद करण्यात आले आहे. याबाबत नातेवाईकांच्या उपस्थितीत समजूत काढण्याचा प्रयत्न करण्यात आला, मात्र परिस्थितीत कोणतीही सुधारणा झाली नाही.
एका घटनेनंतर घरगुती वाद अधिक तीव्र झाल्याने संबंधित महिलेला माहेरी जावे लागले. त्यानंतर तिने पोलिस ठाण्यात तक्रार दाखल केली. प्रकरण महिला समेट कक्षाकडे वर्ग करण्यात आले होते, मात्र समेट न झाल्याने सदर तक्रारीवर पुढील कायदेशीर कारवाईसाठी पोलिसांकडे अर्ज करण्यात आला आहे. पोलिसांनी दिलेल्या माहितीनुसार, तक्रार नोंदविण्याची प्रक्रिया पूर्ण करण्यात आली असून, पुढील तपास कायदेशीर चौकटीत सुरू आहे. सदर बातमीत फिर्यादी, आरोपी व स्थळाची ओळख उघड करण्यात आलेली नाही.
