वणी टाईम्स न्युज : नदी पात्रातून अवैधरित्या रेती उपसा व वाहतूक प्रकरणी महसूल विभागाने तब्बल 6 महिने नंतर 2 एप्रिल 2026 रोजी आरोपी ट्रॅक्टर मालकाविरुद्ध पोलिसात तक्रार दाखल केली. घटनेच्या 6 महिन्यानंतर महसूल विभागाने केलेल्या या कारवाईचे व महसूल विभागाची तत्परतेचे सर्वत्र कौतुक केले जात आहे.
प्राप्त माहितीनुसार ग्राम महसूल अधिकारी रविंद्र निळकंठ उपरे यांनी दिनांक 14 सप्टेंबर 2025 रोजी वाघदरा परिसरात निर्गुडा नदीच्या पुलाजवळ रेती भरलेला एक ट्रॅक्टर जप्त केला होता. ट्रॅक्टरचा टायर पंचर असल्यामुळे त्यातील रेती खाली करुन ट्रॅक्टर क्रमांक MH-29-CJ-6943 व ट्रॉली क्रमांक MH-29V5136 एसटी डेपोच्या आवारात उभा करण्यात आला. सदर प्रकरणी महसूल विभागाने 19 नोव्हेंबर 2025 रोजी वाहन मालक रोहन कन्हैया पारखी विरुद्ध दंडात्मक कारवाई केली.
यानंतर तहसीलदार वणी यांनी दिनांक 9 मार्च 2026 रोजी ट्रॅक्टर मालक रोहन कन्हैया पारखी विरुद्ध वणी पोलिस ठाण्यात गुन्हा दाखल करण्याचे आदेश संबंधित अधिकाऱ्यांना दिले. ज्यावर तब्बल 22 दिवसांनंतर अंमलबजावणी करत ग्राम महसूल अधिकारी रवींद्र उपरे यांनी 2 एप्रिल 2026 रोजी वणी पोलीस ठाण्यात तक्रार नोंदवली.
तक्रारीवरून पोलिसांनी आरोपी रोहन कन्हैया पारखी (35) रा.भगतसिंग चौक, वणी विरुद्ध अवैध रेती चोरी व वाहतुक केल्या प्रकरणी कलम 303 (2) भारतीय न्याय संहीता -2023 सहकलम 48(7), 48(8) (2) महाराष्ट्र जमीन महसुल अधिनीयम-1966 अन्वये गुन्हा नोंद केला.
महसूल विभागाची कमालीची तत्परता !
अवैध रेती चोरी व वाहतुकीच्या या प्रकरणात महसूल विभागाने एका प्रकरणात कारवाईसाठी किती वेळ लागणार याची प्रचिती आणून दिली आहे. 14 सप्टेंबर 2025 रोजी ट्रॅक्टर पकडण्यात आला. 19 नोव्हेंबर 2025 रोजी ट्रॅक्टरवर दंडात्मक कारवाई करण्यात आली. आणि तब्बल 6 महिन्यानंतर आरोपी विरुद्ध पोलीस ठाण्यात तक्रार नोंदविण्यात आली. अशाच कार्यप्रणालीमुळे तालुक्यात रेती तस्करीचा व्यवसाय फोफावत असल्याचे नागरिकांत बोलले जाते.
