मुकुटबन (झरीजामणी) : क्षुल्लक कारणावरून अनुसूचित जातीच्या महिलेला मारहाण करुन जातीवाचक शिवी देणाऱ्या दोन महिलांसह तिघांविरुद्ध मुकुटबन पोलिस ठाण्यात अट्रॉसिटी कायद्यान्वये गुन्हा दाखल करण्यात आला आहे. गोपाल मनोहर नुतीलकंठावार व इतर राहणार मार्की, तालुका- झरीजामणी असे आरोपीचे नाव आहे.
फिर्यादी विद्या दीपक सुरपाम रा. मार्की हिने तक्रार नोंदविली की मिस्त्री कामासाठी टोपले घेऊन गेल्याच्या कारणावरून महिला आरोपींनी संगनमत करुन तिला केस पकडून खाली पाडले व थापड बुक्क्यांनी मारहाण केली. तर आरोपी गोपाल नुतीलकंठावार यांनी तिला जातीवाचक शिवीगाळ करत जीवे मारण्याची धमकी दिली.
फिर्यादीच्या तक्रारीच्या आधारे व वैद्यकीय अहवालाच्या आधारे पोलिसांनी सदर प्रकार गंभीरतेने घेत गुन्हा नोंदवून तपास सुरू केला आहे. या प्रकरणी संबंधित आरोपींवर अनुसूचित जाती आणि जमाती (अत्याचार प्रतिबंधक) कायद्या व भारतीय न्याय संहिता कायद्यानुसार गुन्हा दाखल करण्यात आला असून पुढील चौकशी पोलीस करीत आहेत.
