वणी टाईम्स न्युज : वणी नगर परिषदेच्या नवनिर्वाचित नगराध्यक्ष विद्या खेमराज ऊर्फ सचिन आत्राम तसेच भारतीय जनता पक्षाच्या सर्व नवनिर्वाचित नगरसेवकांचा शपथग्रहण व सत्कार सोहळा सोमवारी दि. 12 जानेवारी रोजी दुपारी 11 वाजता नगर परिषद प्रांगणात मोठ्या उत्साहात पार पडला. या सोहळ्यास राज्याचे आदिवासी विकास मंत्री प्रा. अशोक उईके, भाजप यवतमाळ जिल्हाध्यक्ष ॲड. प्रफुल चव्हाण, माजी जिल्हाध्यक्ष नितीन भुतडा, वणी विधानसभेचे माजी आमदार संजीवरेड्डी बोदकुरवार, माजी नगराध्यक्ष तारेंद्र बोर्डे यांची प्रमुख उपस्थिती होती.
सत्कार सोहळ्यानंतर नवनिर्वाचित नगराध्यक्ष विद्या आत्राम यांच्या अध्यक्षतेखाली पार पडलेल्या पहिल्या सभेत भाजप गटनेते व नगरसेवक राकेश बुगेवार यांची सर्वसंमतीने नगर परिषदेच्या उपाध्यक्षपदी निवड करण्यात आली. तसेच किशन खुंगर व रवी बेलुरकर यांना स्वीकृत सदस्य नगर परिषदेत मान्यता देण्यात आली. यावेळी भाजपचे सर्व 18 नगरसेवक तसेच अपक्ष नगरसेवक राजू भोंगळे उपस्थित होते.
विशेष बाब म्हणजे वणी नगर परिषदेच्या इतिहासात प्रथमच आदिवासी समाजातील महिलेला नगराध्यक्षपदाचा मान मिळाला आहे. शपथग्रहणानंतर झालेल्या पत्रकार परिषदेत नगराध्यक्ष विद्या आत्राम यांनी शहराच्या सर्वांगीण विकासासाठी शंभर दिवसांचा कृती आराखडा तयार करण्यात आल्याची माहिती दिली. नागरिकांचे आरोग्य, शुद्ध पाणीपुरवठा, शिक्षण व्यवस्था व स्वच्छता या मूलभूत बाबींवर नगर परिषद विशेष लक्ष देणार असल्याचे त्यांनी स्पष्ट केले.
या शपथग्रहण सोहळ्यास आदिवासी विकास मंत्री प्रा. अशोक उईके, भाजप जिल्हाध्यक्ष ॲड. प्रफुल चव्हाण, माजी जिल्हाध्यक्ष नितीन भुतडा, माजी आमदार संजीवरेड्डी बोदकुरवार, माजी नगराध्यक्ष तारेंद्र बोर्डे, जिल्हा उपाध्यक्ष संजय पिंपळशेंडे, माजी उपाध्यक्ष श्रीकांत पोटदुखे, भाजप शहराध्यक्ष ॲड. निलेश चौधरी, विजय पिदुरकर, दिनकर पावडे, गजानन विधाते, नगराध्यक्ष विद्या सचिन आत्राम, ललिता बोदकुरवार यांच्यासह सर्व नगरसेवक व नगरसेविका उपस्थित होत्या. कार्यक्रमाचे संचालन तेजस्विनी गव्हाणे यांनी केले, तर आभारप्रदर्शन ॲड. निलेश चौधरी यांनी केले.
उपाध्यक्षपदासाठी रस्सीखेच, अखेर सामंजस्याचा तोडगा
नगरपालिका उपाध्यक्षपदासाठी यावेळी मोठी रस्सीखेच पाहायला मिळाली. या पदासाठी दुसऱ्यांदा निवडून आलेले नगरसेवक राकेश बुगेवार तसेच कुणबी समाजाचे लक्ष्मण उरकुडे इच्छुक होते. कार्यक्रमापूर्वी स्थानिक विश्रामगृहात मंत्री प्रा. अशोक उईके, जिल्हाध्यक्ष ॲड. प्रफुल चव्हाण, माजी आमदार संजीवरेड्डी बोदकुरवार व भाजप पदाधिकाऱ्यांची मॅरेथॉन बैठक झाली. या बैठकीत उपाध्यक्षपदाचे पहिले अडीच वर्ष राकेश बुगेवार व उर्वरित अडीच वर्ष लक्ष्मण उरकुडे यांना देण्याचा निर्णय घेण्यात आला. त्यानंतर सर्व नेतेमंडळी कार्यक्रमस्थळी उपस्थित झाली.
