वणी टाईम्स न्युज : वणी नगर परिषदेत सत्ता स्थापन करण्यासाठी भाजपकडे पुरेशा संख्याबळ असून भाजपला अपक्ष किंवा दुसऱ्या पक्षाच्या सदस्यांचा आतून किंवा बाहेरून पाठिंबा घेण्याची गरज नाही. मात्र शहराच्या विकासासाठी कुणासोबतही दूजाभाव न ठेवता सर्व नगरसेवकांना सहकार्य करण्याची भाजपची नीती आहे. असे स्पष्टीकरण माजी आमदार संजीवरेड्डी बोदकुरवार यांनी दिले आहे.
नगर परिषदेच्या नुकत्याच झालेल्या निवडणुकीत प्रभाग क्रमांक 9 मधून अब्दुल हाफिज सत्तार उर्फ “टाफू” हा अपक्ष नगरसेवक म्हणून निवडून आला होता. निवडून आल्यानंतर 24 डिसेंबर रोजी रात्री त्यांनी आपल्या समर्थकांसह माजी आमदार संजीवरेड्डी बोदकुरवार यांचे घरी जाऊन त्यांची भेट घेतली. नगरपालिकेत भाजपचा नगराध्यक्ष व 18 सदस्य निवडून आणल्याबद्दल टाफूने संजीवरेड्डी बोदकुरवार यांचा पुष्पगुच्छ देऊन अभिनंदन केले.
तर अटीतटीच्या निवडणूकात अपक्ष उमेदवार म्हणून विजयी झाल्यामुळे संजीवरेड्डी बोदकुरवार यांनी त्याचे अभिनंदन केले. मात्र या भेटीची छायाचित्रे सोशल मीडियावर व्हायरल झाल्यानंतर विविध चर्चांना उधाण आला होता. अब्दुल हाफिज उर्फ सत्तार हा अवैध व्यावसायिक म्हणून संपूर्ण शहरात कुख्यात आहे. तसेच त्याच्यावर वणी पोलीस ठाण्यात अनेक गुन्हे दाखल आहे.
त्यामुळे टाफू व संजीवरेड्डी बोदकुरवार यांच्या भेटीमुळे पक्षात व पक्षाबाहेर अनेकांची भुवया उंचावली होती. सत्तेत बहुमत असताना एका गुन्हेगारी प्रवृत्तीच्या नगरसेवकाने भाजपला पाठिंबा दर्शविल्यामुळे भाजपवर टीकेची झोड उठली होती. मात्र या सर्व चर्चेवर खुलासा करताना संजीवरेड्डी बोदकुरवार यांनी स्पष्ट केले की, निवडणुका झाल्यानंतर भाजप तसेच इतर पक्षातील काही उमेदवारांनी त्यांची भेट घेऊन सहकार्याची विनंती केली होती.
दरम्यान 24 तारखेला अपक्ष उमेदवार अब्दुल हाफिज उर्फ टाफूने संजीवरेड्डी बोदकुरवार यांचे घरी जाऊन त्यांची भेट घेतली. तसेच त्याच्या प्रभागाच्या विकासासाठी सहकार्याची विनंती केली. ही औपचारिक भेट म्हणून यात पाठिंबा घेणे किंवा देण्याचा विषय नाही. असे संजीवरेड्डी बोदकुरवार यांनी स्पष्ट केले.
