वणी टाईम्स न्युज : पंजाब मधून ऑनलाइन पद्धतीने तलवार शस्त्र खरेदी केल्याची धक्कादायक घटना समोर आली आहे. वणी पोस्ट ऑफिसचे पोस्टमास्तरच्या सजगतेने उघडकीस आलेल्या या प्रकरणात वणी पोलिसांनी तलवार जप्त करून आरोपीला अटक केली आहे. नरेन्द्र महादेव केळकर (३५), व्यवसाय पानठेला, रा. शिरपूर, ता. वणी असे ऑनलाइन तलवार खरेदी करणाऱ्या आरोपीचे नाव आहे.
दिनांक २३ डिसेंबर २०२५ रोजी सायंकाळी सुमारे ४ वाजताच्या सुमारास वणी पोस्ट ऑफिसमधून पोस्टमास्तर जयप्रकाश बलकी यांनी वणी पोलीस स्टेशनचे ठाणेदार पोलीस निरीक्षक गोपाल उंबरकर यांना फोनद्वारे माहिती दिली की, शिरपूर येथील एका व्यक्तीने पंजाब येथून ऑनलाईन पद्धतीने तलवार मागविली आहे. सदर माहितीच्या आधारे पोलीस निरीक्षकांच्या आदेशानुसार पोलिस उपनिरीक्षक धीरज गुल्हाने स्टाफसह पोस्ट ऑफिस पोहचले.
पोलीस पथकाने प्रथम वणी पोस्ट ऑफिसमध्ये जाऊन संबंधित पार्सलची पाहणी केली. त्यानंतर शिरपूर येथे जाऊन चौकशी केली असता नरेन्द्र महादेव केळकर हा संशयित मिळून आला. त्याने सदर तलवार आपणच ऑनलाईन पद्धतीने मागविल्याची कबुली दिली. त्यानंतर आरोपीला सोबत घेऊन वणी पोस्ट ऑफिस येथे पंचांसमक्ष पार्सल उघडण्यात आले. पार्सलमध्ये निळ्या रंगाचे कव्हर असलेली लोखंडी धातूची पावणे तीन फूट लांबीची तलवार आढळून आली.
प्रतिबंधित शस्त्र बेकायदेशीररीत्या ऑनलाईन मागविल्याने आरोपी नरेन्द्र महादेव केळकर याच्यावर भारतीय शस्त्र कायद्याच्या कलम ४/२५ अंतर्गत गुन्हा दाखल करण्यात आला आहे. पंचांसमक्ष तलवार जप्त करून आरोपीस पुढील कायदेशीर कारवाईसाठी ताब्यात घेण्यात आले. कर्तव्य बजावत असताना वेळीच सजगता दाखवून एकाधी मोठी घटना टाळणारे पोस्टमास्तर जयप्रकाश बल्की यांचा कौतुक होत आहे.
