वणी टाईम्स न्युज : वणी येथून मुकुटबन कडे जाणाऱ्या दुचाकीला सिमेंट बल्करने जोरदार धडक दिली. यात दुचाकी चालवत असलेला प्रफुल संजय गागरे (25) रा. पिंप्रड, तालुका झरीजामनी हा तरुण ठार झाला. तर दुचाकीवर मागे बसलेले एक युवक व युवती गंभीर जखमी झाले.कायर ते पुरड दरम्यान चेंडकापूर येथून थोडं समोर टर्निंगवर शनिवारी सायंकाळी 5.30 वाजता हा भीषण अपघात घडला.
प्राप्त माहितीनुसार पिंप्रड येथील प्रफुल संजय गागरे हा आपल्या हिरो शाईन मोटरसायकल क्रमांक MH 29 CL1324 ने वणी येथून गावाकडे जात होता. यावेळी त्याच्या बाईकवर मागे त्याचा मित्र सुजल भोयरण(20) व त्याची बहीण आंचल भोयर (18) ही बसून होती. चेंडकापूर गावाचे समोरं एका टर्निंगवर त्याची दुचाकीला समोरुन भरधाव वेगाने येत असलेल्या सिमेंट टँकर क्रमांक MH 34 BG 8277 ने त्याच्या दुचाकीला जोरदार धडक दिली.
ट्रकची धडक बसताच दुचाकीवरील तिन्ही रस्त्यावर फेकले गेले. यात दुचाकी चालवत असलेल्या प्रफुल गागरे याच्या डोक्याला, छातीला व उजव्या पायाला गंभीर मार लागली. तर मागे बसलेला सुजल भोयर व मुलगी आंचल भोयर हे दोघांना डोक्याला पायाला गंभीर इजा झाली. अपघातानंतर ट्रक चालक हा ट्रक सोडून फरार झाला. तर जखमींना तत्काळ वणी ग्रामीण रुग्णालयात दाखल करण्यात आले. मात्र रुग्णालयातील डॉक्टरांनी प्रफुल गागरे याला मृत घोषित केलं.
अपघातास जबाबदार सिमेंट ट्रक चालकाला शिरपूर पोलिसाने अटक केली आहे. गंभीर जखमी सुजल भोयर व आंचल भोयर या दोघांना वणी येथील एका खाजगी दवाखान्यात दाखल करण्यात आल्याची माहिती आहे. मृतक प्रफुल गागरे हा आपल्या आईवडिलांचा एकुलता मुलगा होता. पुढील तपास शिरपूर पोलिस करीत आहे.
