वणी टाईम्स न्युज : मागील सहा दिवसांपासून घरातून बेपत्ता असलेल्या एका वृद्ध महिलेचा गावालगत एका शेतात झाडाखाली मृतदेह आढळला. पोमाबाई कवडू शिवरकर (80) रा. नवरगाव, तालुका मारेगाव असे मृत वृद्धेचे नाव आहे. भटकत असताना उष्माघाताने वृद्धाचा मृत्यू झाल्याचा अंदाज व्यक्त करण्यात येत आहे.
प्राप्त माहितीनुसार, मृतक पोमाबाई ह्या त्यांच्या पुत्र सतीश शिवरकर यांच्यासोबत राहत होत्या. मानसिक आजाराने त्रस्त पोमाबाई वारंवार घराबाहेर निघून जात असत व परिसरात भटकत असल्याची माहिती कुटुंबियांनी पोलिसांना दिली. दि. 27 एप्रिल 2026 रोजी त्या घरातून बाहेर पडल्या होत्या. मात्र त्या परत न आल्याने सतीश शिवरकर यांनी दुसऱ्या दिवशी मारेगाव पोलीस स्टेशनमध्ये हरवल्याची तक्रार दाखल केली होती.
दरम्यान, दि. 3 मे रोजी दुपारी सुमारे 12 वाजण्याच्या सुमारास गावकऱ्यांना अनिल सोनमाले यांच्या शेताजवळ एका महिलेचा मृतदेह आढळून आला. याबाबत माहिती मिळताच नातेवाईकांनी घटनास्थळी धाव घेतली. पाहणी केल्यानंतर सदर मृतदेह पोमाबाई शिवरकर यांचाच असल्याचे स्पष्ट झाले. पोलिसांनी घटनास्थळ पंचनामा करुन मृतदेह मारेगाव शासकीय रुग्णालयात पाठविले.
