वणी टाईम्स न्युज : तुम्ही रोख रक्कम विथड्रॉल करायला बँकेत जात आहे तर, सावध व्हा..! बँकेच्या गर्दीत तुमच्या आजूबाजूने किंवा मागे कुणीतरी फिरत आहे का ? ती लहान मुलगा, मुलगी किंवा महिलाही असू शकते. गर्दीत तुमचं लक्ष चुकवून ती तुमच्या रक्कमेवर हात साफ करु शकते. अशीच एक घटना मारेगाव येथे नुकतीच उघडकीस झाली आहे. जिथे दोन महिलांनी बँकेतून काढलेली रक्कम ठेवलेल्या बॅगेच्या आतील बाजूस चिरा मारून 50 हजाराची रक्कम लांबवली.
फिर्यादी राहुल किसन भरडे (३६) रा. डोमा ता. चिमुर जि. चंद्रपूर हे वीज वितरण सबस्टेशन खापरी येथे ऑपरेटर म्हणून कार्यरत आहेत. दि. १० एप्रिल २०२६ रोजी दुपारी सुमारे १२ वाजता, भरडे आणि त्यांचे साथीदार पीयूष वैद्य हे मारेगाव येथील सेंट्रल बँकेत पैसे काढण्यासाठी गेले. त्यांनी प्रथम ५० हजार रुपये काढून बॅगेत ठेवले. त्यानंतर पॅन कार्ड लिंक करण्यासाठी दोघे बँकेबाहेरील झेरॉक्स दुकानात गेले
दरम्यान, बँकेत पुन्हा परत आल्यानंतर गर्दीचा फायदा घेत अज्ञात चोरट्यांनी भरडे यांच्या बॅगेस आतून चिरा मारून ५० हजार रुपये लंपास केले. बॅग तपासल्यावर ही चोरी उघडकीस आली. बँकेतील सीसीटीव्ही फुटेज तपासले असता, तोंडाला स्कार्फ बांधलेल्या दोन संशयित महिला भरडे यांच्या मागे फिरताना दिसून आल्या. त्याच महिलांनी चोरी केल्याचा संशय व्यक्त करण्यात येत आहे.
घटनेनंतर फिर्यादी तात्काळ पोलीस स्टेशनला तक्रार देऊ शकले नाहीत. मात्र, नंतर त्यांनी मारेगाव पोलीस स्टेशन येथे हजर राहून तक्रार दिली. यावरून पोलिसांनी अज्ञात महिला आरोपी विरुद्ध कलम ३०३ (२) भारतीय न्याय संहिता (BNS) अंतर्गत गुन्हा दाखल करुन संशयित महिलांचा शोध सुरू केला
टिप: बातमीच्या उत्कृष्ट सादरीकरणासाठी AI इमेजचा वापर करण्यात आला आहे.
