जितेंद्र कोठारी, वणी | शहराच्या विकासासाठी महत्त्वाकांक्षी मानल्या जाणाऱ्या “नमो उद्यान” प्रकल्पावरून वणीमध्ये सध्या राजकीय वातावरण चांगलेच तापले आहे. एकाच कामाचे तब्बल तीनदा भूमिपूजन झाल्याने हा प्रकल्प सुरू होण्यापूर्वीच वादाच्या भोवऱ्यात सापडला आहे.
काय आहे ‘नमो उद्यान’ ?
राज्य शासनाच्या ‘वैशिष्ट्यपूर्ण’ योजनेअंतर्गत नगर परिषद क्षेत्रात आधुनिक उद्यान विकसित करण्यासाठी वणी नगर परिषदेला 1 कोटी रुपयांची निधी मंजूर झाली. या निधीतून आनंद नगर परिसरात मोकळ्या जागेवर सर्व सोयियुक्त अद्यावत “नमो उद्यान” बगीचा उभारण्यात येणार आहे. या उद्यानांमुळे शहरातील नागरिकांना दर्जेदार सार्वजनिक सुविधा उपलब्ध व्हाव्यात, हा मुख्य उद्देश आहे.
भूमिपूजनवरून वादाची ठिणगी !
6 एप्रिल 2026 रोजी नगर परिषद अध्यक्ष विद्या आत्राम यांच्या उपस्थितीत माजी आमदार संजीवरेड्डी बोदकुरवार यांनी आनंद नगर येथे नमो उद्यानाचे पहिले भूमिपूजन केले. मात्र, हे शासकीय काम असताना विद्यमान आमदार संजय देरकर यांना डावलल्याचा आरोप करत शिवसेना आक्रमक झाली. त्यानंतर 16 एप्रिल रोजी आमदार देरकर यांनी समर्थकांसह त्याच ठिकाणी दुसऱ्यांदा भूमिपूजन केले. एवढ्यावरच न थांबता, शिवसैनिकांनी पूर्वीचा बॅनर फाडल्याचा आरोप करत भाजपकडून पुन्हा 18 एप्रिल रोजी तिसऱ्यांदा भूमिपूजन करण्यात आले.
⚖️ श्रेयवादाची लढाई की विकासाचा अडथळा?
नमो उद्यानाचे “काम सुरू होण्यापूर्वीच तीनदा भूमिपूजन” प्रकारामुळे नागरिकांमध्ये संभ्रमाचे वातावरण निर्माण झाले आहे. हा प्रकार विकासापेक्षा राजकीय श्रेयासाठीची स्पर्धा अधिक अधोरेखित करत असल्याची चर्चा शहरात रंगली आहे.
🗣️ राजकीय आरोप-प्रत्यारोप
‘नमो उद्यान’ हा भारतीय जनता पक्षाचा खाजगी प्रकल्प नसून राज्य शासनाच्या निधीतून साकार होणार आहे. आणि शासकीय प्रकल्पाच्या भूमिपूजन कार्यक्रमात प्रोटोकॉल बाजूला सारून मुद्दामहून विद्यमान लोकप्रतिनिधीला वगळण्यात आले. हा प्रकार शिवसेना खपवून घेणार नाही.
सुधीर थेरे : शिवसेना गट नेता , न. प. वणी
नमो उद्यान प्रकल्पाची कार्यान्वयन यंत्रणा नगर परिषद आहे. भूमिपूजन कोणाच्या हस्ते करायचं ? हा नगर परिषदेचा अधिकार आहे. वणी नगर परिषदेत भाजपची सत्ता आहे. त्यामुळे नगराध्यक्ष यांच्या हस्ते भूमिपूजन करण्यात आला. शिवसेनेकडून बेकायदेशीर हस्तक्षेप करून वाद निर्माण करण्यात आले.
राकेश बुगेवार – उपाध्यक्ष व भाजप गट नेता, न. प. वणी
❗ नागरिकांचा सवाल
शहरात विकास कामावरून आजी माजी आमदार श्रेय लाटण्याचा प्रयत्न केल्याचे दिसत आहे. रस्ते, निवारे, पिण्याचे पाणी, अद्यावत बस स्थानक, नमो उद्यान व इतर कामासाठी शासनाने मंजूर केलेली निधी वरून आमदार संजय देरकर व माजी आमदार संजीवरेड्डी बोदकुरवार यांच्यात रस्सीखेच सुरू आहे. त्यामुळे नमो उद्यान साकार होणार की, फक्त भूमिपूजनच चालणार ?” असा प्रश्न वणीकर नागरिक विचारत आहे.
🧭 पुढे काय ?
नमो उद्यान हा शहराच्या विकासासाठी महत्त्वाचा प्रकल्प असला तरी, सध्या तो राजकीय श्रेयवादाचा केंद्रबिंदू बनला आहे. आता सर्वांचे लक्ष प्रत्यक्ष काम कधी सुरू होते याकडे लागले आहे.
