🚨पोलिसांच्या दुचाकीला ट्रकची धडक; चार वर्षीय चिमुकलीचा मृत्यू

वणी टाईम्स न्युज : वणी–मुकुटबन मार्गावरील गणेशपूर परिसरात अज्ञात भरधाव ट्रकने दुचाकीला दिलेल्या धडकेत पोलिस कर्मचारी व त्यांची चार वर्षांची मुलगी गंभीर जखमी झाल्याची दुर्दैवी घटना २४ जानेवारी रोजी रात्री घडली. अपघातात गंभीर जखमी मुलीला उपचारासाठी चंद्रपूर येथे नेले असता उपचार सुरु होण्यापूर्वीच चिमुकलीचा मृत्यू झाला.

या प्रकरणी सूगम हॉस्पिटल, वणी येथे भरती जखमी पोलिस कर्मचारी श्रीनिवास चंद्रय्या गौन्लावार (३७), रा. ड्रीमलँड सिटी यांनी दिलेल्या बयाणानुसार २४ जानेवारी रोजी रात्री सुमारे ९.३० वाजताच्या सुमारास आपली दुचाकी क्रमांक MH29- 7097 वरून मुलगी कु. श्रावनी (४) हिला मागे बसवून ड्रीमलँड सिटी, वणी येथील घरी जात होते. गणेशपूर येथील पानठेल्याजवळ दुचाकी वळवित असताना वणीहून मुकुटबनकडे जाणाऱ्या अज्ञात ट्रकने भरधाव वेगात येत त्यांच्या दुचाकीला जोरदार धडक दिली.

या अपघातात दुचाकी रस्त्याच्या बाजूला फेकली गेली असून श्रीनिवास गौन्लावार यांच्या दोन्ही पायांना व चेहऱ्याला दुखापत झाली, तर चिमुकली श्रावनी हिला हात व पोटाला गंभीर मार लागला. अपघातानंतर ट्रकचालक घटनास्थळी न थांबता पसार झाला. स्थानिक नागरिकांनी जखमींना तातडीने सूगम हॉस्पिटल, वणी येथे दाखल केले. पुढील उपचारासाठी मुलीला चंद्रपूर येथे रेफर करण्यात आले; मात्र उपचारासाठी नेत असताना तिचा दुर्दैवी मृत्यू झाला.

विवाहितेचा छळ : पती, सासू, सासरे विरुद्ध पोलिसात तक्रार

या घटनेने परिसरात हळहळ व्यक्त होत असून, अपघातास कारणीभूत ठरलेल्या अज्ञात ट्रकचालकाविरुद्ध कठोर कायदेशीर कारवाईची मागणी होत आहे. सीसीटीव्ही फुटेजवरून अपघातास जबाबदार ट्रकची ओळख पटली असून लवकरच ट्रक व चालकास ताब्यात घेण्यात येईल, अशी माहिती पोलिस सूत्रांकडून मिळाली आहे.