वणी टाईम्स न्युज | मानव-वन्यजीव संघर्षामुळे बाधित झालेल्या व्यक्तींना तातडीची कायदेशीर मदत, भरपाई मिळवून देणे तसेच पुनर्वसन प्रक्रियेस सहाय्य करण्यासाठी यवतमाळ जिल्हा विधी सेवा प्राधिकरणाने महत्त्वपूर्ण पाऊल उचलले आहे. या अनुषंगाने जिल्हा विधी सेवा प्राधिकरणात पॅरा लीगल स्वयंसेवक वासुदेव विधाते यांची नोडल अधिकारी म्हणून नियुक्ती करण्यात आली आहे.
महाराष्ट्र राज्य विधी सेवा प्राधिकरण, मुंबई यांच्या निर्देशानुसार आणि NALSA , Human-Wildlife Conflict Victims Support Scheme-2025 योजनेच्या प्रभावी अंमलबजावणीसाठी हा निर्णय घेण्यात आला आहे. यासंदर्भातील नियुक्ती आदेश जिल्हा विधी सेवा प्राधिकरण, यवतमाळचे सचिव व दिवाणी न्यायाधीश व. स्तर दिपक एन. दाभाडे यांनी जारी केला आहे.
या योजनेचा मुख्य उद्देश मानव-वन्यजीव संघर्षामध्ये जखमी झालेल्या किंवा मृत्यू झालेल्या व्यक्तींच्या कुटुंबियांना आवश्यक ती कायदेशीर मदत उपलब्ध करून देणे, शासनाकडून मिळणारी भरपाई मिळवून देण्यासाठी मार्गदर्शन करणे आणि पुनर्वसन प्रक्रियेत सहकार्य करणे हा आहे.
नियुक्त नोडल अधिकारी संबंधित पीडित व्यक्ती व त्यांच्या कुटुंबीयांशी संपर्क साधून त्यांना विविध शासकीय योजनांचा लाभ मिळवून देण्यासाठी समन्वय साधणार आहेत. तसेच वन विभाग, महसूल विभाग आणि विधी सेवा प्राधिकरण यांच्यातील दुवा म्हणूनही ते काम पाहणार आहेत.
जिल्ह्यात वाघ, बिबट्या, अस्वल तसेच इतर वन्यप्राण्यांच्या हल्ल्यांच्या घटना वारंवार घडत असल्याने या नियुक्तीमुळे संघर्षग्रस्त नागरिकांना त्वरित मदत मिळण्यास मदत होणार असल्याचा दावा वासुदेव विधाते यांनी केला आहे.
