वणी टाईम्स न्युज : पोलीस वर्धापन दिनाचे औचित्य साधत वणी पोलीस स्टेशन येथे मंगळवार 6 जानेवारी रोजी कायदेविषयक जनजागृती व समाजप्रबोधनाचा विशेष उपक्रम राबविण्यात आला. या उपक्रमाचा मुख्य उद्देश विद्यार्थ्यांमध्ये कायद्याविषयी जाणीव निर्माण करणे तसेच पोलीस–नागरिक संवाद अधिक दृढ करणे हा होता.
या उपक्रमांतर्गत इंटरनॅशनल ब्लॅक डायमंड स्कूल, आदर्श हायस्कूल, विवेकानंद विद्यालय, ज्ञानदा स्पर्धा परीक्षा केंद्र, अभ्यासिका आंबेडकर चौक, वणी येथील विविध शाळा व कोचिंग क्लासेसना पोलीस अधिकारी व कर्मचाऱ्यांनी भेटी दिल्या. याशिवाय भगतसिंग चौक येथील आदर्श हायस्कूलच्या विद्यार्थ्यांना वणी पोलीस स्टेशनला प्रत्यक्ष भेटीसाठी आमंत्रित करण्यात आले होते.
पोलीस स्टेशनमध्ये विद्यार्थ्यांना दैनंदिन पोलीस कामकाज, तक्रार नोंदविण्याची प्रक्रिया, गुन्ह्यांचा तपास कसा केला जातो, आपत्कालीन परिस्थितीत पोलीसांची भूमिका तसेच पोलिसांकडील शस्त्रांची माहिती प्रत्यक्ष उदाहरणांसह देण्यात आली. यामुळे विद्यार्थ्यांना पोलीस यंत्रणेचे कार्य जवळून समजण्याची संधी मिळाली.
कार्यक्रमादरम्यान महिला विषयक कायदे, सायबर गुन्हे, गुड टच – बॅड टच, बालसुरक्षा, नव्या कायद्यांतील बदल तसेच आपत्कालीन हेल्पलाईन क्रमांक 112, 1091 व 1098 याबाबत सविस्तर मार्गदर्शन करण्यात आले. विद्यार्थ्यांनी उत्स्फूर्त सहभाग नोंदवत प्रश्नोत्तरांच्या माध्यमातून आपल्या शंका दूर केल्या.
हा उपक्रम वणी पोलीस स्टेशनचे ठाणेदार पोलीस निरीक्षक गोपाल उंबरकर यांच्या मार्गदर्शनाखाली पार पडला. यावेळी सहाय्यक पोलीस निरीक्षक प्रियंका चौधरी, सहायक पोलीस निरीक्षक कपिल पाटील, पीएसआय सुदाम आसोरे, पीएसआय अंकुश वडतकर, पीएसआय शुभम महापुरे, पोलीस हेडकॉन्स्टेबल कावळे, पोलीस कॉन्स्टेबल शाम राठोड व इमरान खान यांची उपस्थिती होती. या जनजागृती उपक्रमामुळे विद्यार्थ्यांमध्ये कायद्याबाबत सकारात्मक दृष्टिकोन निर्माण होऊन पोलीस व समाजातील विश्वास अधिक बळकट होण्यास निश्चितच मदत होणार आहे.
