📰 गांधी चौक गाळे प्रकरण : विरोधकांकडून दिशाभूल, नगरपरिषदेकडून खुलासा

जितेंद्र कोठारी, वणी | येथील गांधी चौकातील गाळे प्रकरणावरून वणी शहरात निर्माण झालेल्या वादाच्या पार्श्वभूमीवर नगरपरिषदेकडून सविस्तर खुलासा करण्यात आला आहे. सोमवार 23 मार्च रोजी नगराध्यक्ष यांच्या दालनात आयोजित पत्रकार परिषदेत नगराध्यक्ष विद्या आत्राम यांनी सदर प्रकरणात विरोधी पक्षाकडून जनतेची दिशाभूल केली जात असल्याचा आरोप करत कायदेशीर कारवाईचा इशारा दिला.

नगरपरिषदेकडून जारी केलेल्या प्रेस नोटनुसार, दिनांक ४ फेब्रुवारी २०२६ रोजी झालेल्या सर्वसाधारण सभेत गांधी चौकातील गाळ्यांबाबत कोणताही नवीन ठराव मंजूर करण्यात आलेला नाही. केवळ सद्यस्थिती राज्य शासन व उच्च न्यायालयासमोर मांडून त्यांचे मार्गदर्शन घेण्याचा निर्णय घेण्यात आला आहे.

⚖️ प्रकरण न्यायालयात प्रलंबित

गांधी चौक परिसरातील सुमारे १६० गाळ्यांमुळे नगरपरिषदेला आर्थिक नुकसान होत असल्याबाबत काही वर्षांपूर्वी तक्रारी दाखल झाल्या आहेत. हे प्रकरण सध्या उच्च न्यायालयात प्रलंबित असून, शासनाच्या आदेशांनाही स्थगिती देण्यात आलेली आहे. त्यामुळे या विषयावर थेट निर्णय घेणे शक्य नसल्याचे मुख्याधिकाऱ्यांनी सभागृहात स्पष्ट केले.

🏛️ सभागृहाचा निर्णय काय ?

सभेत उपस्थित सदस्यांनी शासन व न्यायालयाच्या निर्देशांचे उल्लंघन होणार नाही याची खबरदारी घेतली. त्यामुळे कोणताही ठोस ठराव न करता, पॅनल अधिवक्त्यामार्फत संपूर्ण वस्तुस्थिती शासन व न्यायालयास कळवून त्यांचे मत घेण्याचे ठरविण्यात आले.

🏗️ विकासाचा प्रस्ताव पुढे

नगरपरिषदेत काही सदस्यांनी गांधी चौक परिसरात आधुनिक बहुमजली व्यापारी संकुल उभारण्याचा विचार मांडला. यात विद्यमान गाळेधारकांना त्याच ठिकाणी समाविष्ट करून अतिरिक्त २०० ते ३०० नवीन गाळे निर्माण करण्याचा प्रस्ताव आहे. या माध्यमातून नगरपरिषदेला मोठ्या प्रमाणात महसूल मिळण्याबरोबरच स्थानिक युवकांना रोजगाराच्या संधी उपलब्ध होण्याची शक्यता व्यक्त करण्यात आली.

रंगनाथ स्वामी यात्रा निविदा प्रक्रियेवर नगरपरिषद वणीचा खुलासा

❗ विरोधकांवर आरोप

प्रेस नोटमध्ये विरोधी पक्षनेते सुधीर धेरे यांनी सभेतील वस्तुस्थिती माध्यमांसमोर मांडली नसल्याचा आरोप करण्यात आला आहे. तसेच, सभेत तटस्थ राहिल्यानंतर बाहेर चुकीची माहिती देऊन राजकीय हेतू साधण्याचा प्रयत्न केल्याचेही नमूद करण्यात आले आहे. यासोबतच, सभासदांवर आर्थिक गैरव्यवहाराचे अप्रत्यक्ष आरोप केल्याबद्दल संबंधितांवर अब्रुनुकसानीची कायदेशीर कारवाई करण्यात येणार असल्याचा इशाराही देण्यात आला आहे.

🖋️ पत्रकारांच्या प्रश्नावर नगराध्यक्षाची चुप्पी

गांधी चौकात नवीन बहुमजली व्यापारी संकुल उभारण्याच्या प्रस्तावामध्ये विद्यमान गाळेधारकांना त्याच ठिकाणी समाविष्ट करण्याचा विषयावर पत्रकारांनी नगराध्यक्ष व उपाध्यक्ष यांच्यावर प्रश्नांची सरबत्ती केली. गांधी चौकातील गाळेधारकांची लीजची अवधी संपलेली आहे. शिवाय गांधी चौकातील 160 गाळ्यांपैकी मूळ गाळेधारक बोटावर मोजता येईल इतकेच शिल्लक आहे. त्यामुळे विद्यमान गाळेधारकांचे हित जोपासण्याची फिकर सोडून सर्व गाळे नव्याने लिलाव का करण्यात येऊ नये? या प्रश्नावर नगराध्यक्ष व उपाध्यक्ष यांनी मौन बाळगले.

📌 निष्कर्ष

गांधी चौक गाळे प्रकरणात कोणताही अंतिम निर्णय न घेता केवळ शासन व न्यायालयाच्या मार्गदर्शनाची प्रतीक्षा करण्याची भूमिका नगरपरिषदेकडून स्पष्ट करण्यात आली आहे. दरम्यान, या मुद्द्यावरून राजकीय आरोप-प्रत्यारोपांना उधाण आले असून, पुढील घडामोडींवर सर्वांचे लक्ष लागले आहे.