वणी टाईम्स न्यूज : आगामी 6 ऑगस्ट रोजी वणी ते शिरपूर कावड यात्रेची तयारी सध्या जोमात सुरू आहे. वणी शहरात सलग दुसऱ्या वर्षी भव्य स्वरूपात होणाऱ्या या धार्मिक यात्रेच्या पार्श्वभूमीवर शिवभक्तांमध्ये प्रचंड उत्साहाचे वातावरण आहे. यात्रा यशस्वी व्हावी यासाठी सर्व समित्या आणि स्वयंसेवक कामाला लागले आहेत.
कावड यात्रेत सहभागी होऊन गंगाजलाने भरलेली कावड वाहून नेण्याची इच्छा असलेल्या शिवभक्तांसाठी समितीतर्फे मोफत कावड उपलब्ध करून देण्यात येत आहे. कावड यात्रेला अवघे 5 दिवस राहिले असून कावड नेण्यासाठी समितीचे कार्यकर्ता शैलेश ढोके मोबा. नंबर 9822561450 यांच्याशी संपर्क साधावा. तसेच ज्यांना स्वतः किंवा मुलामुलींना शिव पार्वती व इतर देवी देवतेचे रूपात श्रृंगार करून झांकी मध्ये सामील होण्याची इच्छा आहे. त्यांनीही याबाबत पूर्व माहिती द्यावी. असे आवाहन आयोजक समितीकडून करण्यात आले आहे.
महा रुद्राभिषेक पूजेचे आयोजन
कावड यात्रा निघण्यापूर्वी स्थानीय जैताई माता मंदिर परिसरातील शिवालयात 6 ऑगस्ट रोजी सकाळी 5 वाजता ‘महा रुद्राभिषेक पूजा’चे आयोजन करण्यात आले आहे. ही पूजा अत्यंत पवित्र आणि फलदायी मानली जाते. ज्या शिवभक्तांना या रुद्राभिषेक पूजेत सहभागी व्हायचं आहे, त्यांनी पती-पत्नींसह पूजेसाठी निश्चित वेळेत उपस्थित राहण्याचं आवाहन आयोजकांनी केलं आहे. या रुद्राभिषेक पूजेमुळे वातावरण आध्यात्मिकतेने भरून जाईल आणि कावड यात्रेचा प्रारंभही मंगलमय होईल, असा विश्वास आयोजक व्यक्त करत आहेत.
