वणी टाईम्स न्युज : शहरातील टिळक नगर वस्ती परिसरात सर्व हिंदू समाजाच्या वतीने आज बुधवार, दि. १८ फेब्रुवारी २०२६ रोजी सायंकाळी ६ वाजता ‘विशाल हिंदू संमेलन’ आयोजित करण्यात आले आहे. कार्यक्रमाचे स्थळ श्री जेताई देवस्थान, टिळक नगर वस्ती असे असून हिंदू जनजागृती, सामाजिक ऐक्य व सनातन संस्कृतीबाबत जागर निर्माण करण्याचा या संमेलनाचा उद्देश आहे.
आयोजकांनी दिलेल्या माहितीनुसार, हिंदू समाजाला दिशा, नवीन ऊर्जा व चेतना देण्यासाठी तसेच सनातन धर्म व सामाजिक एकात्मतेचे प्रतीक म्हणून हा उपक्रम राबविण्यात येत आहे. नागरिकांनी कुटुंबियांसह मोठ्या संख्येने उपस्थित राहून धर्मकार्यांत सहभागी व्हावे, असे आवाहन करण्यात आले आहे.
कार्यक्रमात आशीर्वचनासाठी प्रबोधनकार, व्यसनमुक्ती व समाज सुधारक श्री संत खेमराज महाराज पावडे (पिंपरी, कायर) तसेच संत ज्ञानी प्रेमसिंगजी महाराज (वाई गुरुद्वारा) उपस्थित राहणार आहेत. प्रमुख वक्ते म्हणून श्री क्षेत्र कळंब येथील युवा व्याख्याते राजेंद्र ताजणे (शिवांश) यांचेही विशेष व्याख्यान होणार आहे.
संमेलनाआधी दुपारी १२ ते २ या वेळेत रंगोली प्रदर्शन आयोजित करण्यात आले असून सायंकाळी ४.३० वाजता कलश यात्रा काढण्यात येणार आहे. कार्यक्रमानंतर उपस्थितांसाठी महाप्रसादाची व्यवस्था करण्यात आली आहे.
सदर कार्यक्रमाचे आयोजन सकल हिंदू समाज, टिळक नगर वस्ती, वणी यांच्या वतीने करण्यात आले असून सदाशिवनगर, मनीषनगर, जि.प. कॉलनी, लक्ष्मीनगर, विनायक नगर, रवि नगर, बँक कॉलनी, टिळक नगर व जेताईनगर परिसरातील नागरिकांनी सहकार्य करावे, असे आयोजकांनी आवाहन केले आहे.
