वणी टाईम्स न्युज | एका महिलेच्या नावाने अज्ञात व्यक्तीने बनावट Instagram आयडी तयार करून तिचे फोटो व व्हिडिओ व्हायरल करत बदनामी केल्याचा धक्कादायक प्रकार समोर आला आहे. या प्रकरणी घोन्सा परिसरातील पीडित महिलेने मुकुटबन पोलीस स्टेशनमध्ये लेखी तक्रार दाखल केली असून पोलिसांनी गुन्हा नोंद करून तपास सुरू केला आहे.
तक्रारीनुसार, पीडित महिलेला डिसेंबर 2025 मध्ये एका अनोळखी मोबाईल क्रमांकावरून वारंवार कॉल येत होते. संबंधित व्यक्तीने ओळख नसतानाही तिच्याशी जबरदस्तीने बोलण्याचा प्रयत्न केला व नकार दिल्यास बदनामी करण्याची धमकी दिली. यानंतर महिलेला सोशल मीडियावर तिच्या नावाने बनावट Instagram आयडी तयार केल्याची माहिती मिळाली.
सदर आयडीवर तिचा फोटो डीपी म्हणून वापरून इतर फोटो व व्हिडिओ अपलोड करण्यात आले होते. पुढे आरोपीने वेगवेगळ्या नावांनी आणखी बनावट आयडी तयार करून तिच्या तसेच तिच्या पतीच्या फोटोचा गैरवापर करत सोशल मीडियावर प्रसारित केले. यामुळे पीडितेला मोठ्या प्रमाणात मानसिक त्रास सहन करावा लागत आहे. दरम्यान, आरोपीकडून वारंवार फोन करून “तुम्ही काहीच करू शकत नाही” अशा प्रकारच्या धमक्या दिल्या जात असल्याचेही तक्रारीत नमूद करण्यात आले आहे.
या प्रकरणी पोलिसांनी अज्ञात व्यक्तीविरुद्ध माहिती तंत्रज्ञान अधिनियमाच्या कलम 66(C) व 67(A) तसेच भारतीय न्याय संहिता (BNS) 2023 मधील कलम 351(4), 356 आणि 356(2) अंतर्गत गुन्हा दाखल केला आहे.पोलिसांनी आरोपीचा शोध सुरू केला असून सायबर तपासाद्वारे संबंधित व्यक्तीपर्यंत पोहोचण्याचे प्रयत्न सुरू आहेत.
